Барыын-Хемчик кожууннуң Аксы-Барлык суурда фельдшер-акушер пунктузунуң база Эрги-Барлык суурда эмчи амбулаториязының ажыдыышкыны байырлыг байдалга болуп эрткен.
Тываның Баштыңы Владислав Ховалыг объектилерниң ажыттынганын дыңнадып тура, ылаңгыя көдээ суурларда кадык камгалал системазын хөгжүдери регион эрге-чагыргазының мурнады хөгжүдер сорулгазы болуп келген болгаш болуп артпышаан дээрзин онзалап демдеглээн.
Президент Владимир Путинниң шиитпири-биле боттандырган «Узун болгаш идепкейлиг назын» чаа национал төлевилел езугаар кадык камгалалының эгеки чадазын эде чаартыр программазы-биле бо кадык камгалал албан черлериниң тудуун боттандырган.
«Объект бүрүзү кадык камгалалының сөөлгү үениң технологиялары-биле бүрүн дериттинген, дүрген интернетте кожуп, чаңгыс аай чурагай системазынче кирген. Ынчангаш чурттакчыларга телемедицина консультацияларын болгаш эмчи шинчилелдериниң бирги чадазын ол-ла черге эртип алыр аргалыг апарган. Ынчалдыр республиканың чурттакчыларынга шынарлыг болгаш чедингирин эмчи дузазын чедип алыр аргалыг болган бис» – деп, Владислав Ховалыг бодунуң Телеграм каналынга дыңнаткан.
Аксы-Барлык суурда фельдшер-акушер пунктузунда көдээ черниң фельдшери Шахзодахон Абдурасулова ийиги чыл ажылдап турар. Ол ажылдаан үезинде суурнуң шупту 1014 чурттакчылары-биле таныжып алган. Эрткен чылын Эрги-Барлыкка алды чаш төрүттүнген болза, бо чылын фельдшер-акушер пунктузу ийи божуур иени хайгааралда алган.
Фельдшер Сайлык Куулар – Эрги-Барлыкта чаа эмнелге амбулаторияның эргелекчизи. Эмнелгеде 1053 чурттакчы быжыглаттынган, ооң иштинде 344 чаш бар, оларның чедизи чаа-ла төрүттүнген. Эмнелгеде дөрт иштиг херээжен кижи бүрүткеттинген.
Чаа оран-савада автоматчыткан ажылчын олуттарны ажыдып, дүрген ажылдаар интернетте кошкан, телемедицина консультацияларын, бирги эмчи шинчилгезин, хоочураан аарыглыг аарыг кижилерни улаштыр хайгаараар, республиканың эмнелгелериниң тускай мергежилдиглери-биле ырактан харылзажыр аргалар тургустунган.
«Узун болгаш идепкейлиг назын», «Өг-бүле» национал төлевилелдер езугаар Тывага 2025 чылда 12 объекти туттунган (10 фельдшер-акушер пунктузу болгаш ийи эмнелге амбулаториязы); кадык камгалалының беш албан черлеринге үндезин септелгени кылган; кадык камгалалының эгеки чадазынга 179 санныг медицина дериг-херекселин, реабилитацияга 207, республиканың Перинаталдыг төвүнүң хереглелдеринге 153 санныг медицина дериг-херекселин алган; 46 автомобильди база көжүп чоруур ийи рентгенография биле маммографияны садып алган.
