А.С. Пушкин аттыг Национал ном саңының чурт-шинчилел чогаалының болгаш национал библиография килдизиниң ажылдакчылары Кызылдың 2 дугаар А.А. Алдын-оол аттыг школаның 8 «в» клазының өөреникчилеринге «Башкы дээрге хүндүткелдиг мергежил» деп хемчегни эрттиргенин ном саңы дыңнаткан.
Ном саңының ажылдакчылары уругларның башкы мергежилиниң дугайында билиин улам-на ханыладып, башкызынга ынак, ону хүндүлээр, аңаа чоргаарланыр ужурлуг дээрзин билиндирген.
Ужуражылганың аалчызы, мергежилинге бердинген, арга-дуржулгалыг башкы, билдингир шүлүкчү – Лидия Ооржак .
Лидия Ооржак башкы мергежили бүгү-ле кижилерге ажык-дузалыын таныштырып көргүспүшаан, башкыларга тураскааткан бодунуң чогааткан шүлүктеринден одуругларны номчаанын уруглар аажок сонуургаан.
Башкы кижи – каяа-даа хүндүткелдиг, ачы-буянныг, кижиниң келир үези, салым-чаяаны, амыдырал-чуртталгазы-биле тудуш холбаалыг нарын мергежилдиң бирээзи.
Бо мергежилди езулуг-ла сагыш-сеткилинден бердинген, кандыг-даа бергелерге торулбас, бичии чаштарның, ада-иелерниң сагыш-сеткилин болгаш аажы-чаңын бүгү талазы-биле ханы билир, оларга ынак, бодунуң билиг-мергежилин чаа-чаа аргалар-биле хүн бүрүде чаартып, байыдып, дилеп, тып, ону ажылынга чогаадыкчы ажыглап чоруур база бир тускай салым-чаяанныглар шилип алыр дээрзин уруглар билип алганнар.
Класс башкызы база өөреникчилер солун хемчег дээш өөрүп четтиргенин илереткен.
