Шагаан-Арыгның 1 биле 2 дугаар школаларының, гимназияның болгаш Арыг-Үзүү, Иштии-Хем, Чаа-Хөл школаларының сески классчылары "Сыын-Чүрээнче" аян-чорукту кылганын чагырга чери дыңнаткан.
Уругларның туризм төвүнүң өөреникчилери, республикага туризм слеттарының тиилекчилери школачыларга мастер-класстарны көргүскеннер. Олар сынга чедир чадаг кылашташпышаан, орук ара турисчи багларны канчаар баглаарын болгаш кандыг үеде ажыглаарын, одагларның хевирлерин билип алган.
Туризм төвүнүң башкызы Владимир Бадарчы "Сыын-Чүрээниң" эдээнге аян-чорукчуларга ырадыр шураары, граната октаары, турисчи кижиниң билиглерин хынаары, бирги эмчи дузазын чедирери, саазын самолеттар кылгаш ужудары дээш солун маргылдааларны башкарып эрттирген.
Даг кырынче чаржып үнер мөөрейге Иштии-Хемниң сески классчызы Эрнест Данзы-Белек эң кашпагайын көргүскен. Ооң соондан Айдемир Монгуш (1 дугаар школа), Сайын-Белек Ондар (гимназия) эрес-кашпагайлар санынче киргеннер.
Школачылар аян-чоруун улаштыр Иштии-Хем суурже уламчылаан. Суму чагыргазы, клуб, школа коллективтери турисчилерни чылыы-биле уткуп-хүлээп алгаш, амданныг аъш-чеми-биле хүндүлээннер.
Аян-чорукчу маргылдааларның шаңналдарын клубка тывыскан. Бирги черни Чаа-Хөлдүң школачылары, ийиги черни Иштии-Хемниң, үшкү черни Шагаан-Арыгның 2 дугаар школазының өөреникчилери чаалап алган. "Тиилелгеже чүткүл" деп тускай шаңналды гимназияның, "Идепкейлиг киржилге" деп шаңналды Арыг-Үзүү школазының сески классчыларынга тывыскан.
Кожууннуң уругларның туризм төвүнүң шаңнал бижиктерин тыпсып тура, төптүң удуртукчузу Чойганмаа Даваа арыг агаарга, бойдус-чурумалдыг черге мөөрейлер-биле согажалаттынган аян-чорук элээдилерге ажыктыг болгаш солун эрткенин түңнеп, аян-чоруктар моон-даа соңгаар уламчылаар дээрзин чугаалаан.
Элээди турисчилер төрээн чер чуртунуң чараш черин сонуургап, мага-хандыр дыштанып алганнар.
