Өскүс болгаш ажаал-тежээлдези чок арткан уругларның амыдырап-чурттаарының эргелерин камгалаары Тыва Республиканың социал политиказының кол угланыышкыны. Бо неделяда өскүс болгаш ажаал-тежээлдези чок арткан тес-хемчилерге чаа бажыңнар дүлгүүрлерин байырлыг байдалга тывыскан.
Бажыңналган өг-бүлелер оран-савазынче көжүп кирип эгелээннер. Аас-кежиктиг өг-бүлелерниң бирээзи – Байыр биле Азията Эртинелер. Баир - чажында-ла өскүс арткан, дөргүл-төрелдериниң аразынга өскен. Амгы үеде ол К. Баазан-оол аттыг культура бажыңында методистеп ажылдавышаан, “Өлчей” фольклор ансамбльди удуртуп турар. Өөнүң ишти Азията - садыгжы. Олар үш ажы-төлдүг, уругларының хеймери биргиклассчы. Аныяк өг-бүле хөй чылдар дургузунда бажың-балгат чок, төрелдеринге азы чок болза, бажың хөлезилеп амыдырап турганнар. “Бажың ээлчээ хөй болгаш, алыры дыка берге-дир. 2006 чылда-ла бажың ээлчээнге туруп алган бис. Үр манаанывыс халас барбаан, бажыңывысты алдывыс, ам чурттаар оран-савалыг болдувус. Өг-бүлем мурнундан
Тываның Чазаанга база кожууннуң чагыргазынга өөрүп четтиргенивисти илередип тур мен” – деп мөгейгеш, өөрүшкүзүн хөөмей-сыгыды-биле үлешти. Баир чаа алган бажыңының девискээринге чунар-бажың, гараж кыллгаш, огород база тарып алыр деп сорулга салып алганын чугаалады.
Чоокку үеде база шак-ла ындыг үш бажыңның дүлгүүрлерин аныяк өг-бүлелерге тыпсыр.
