Биче болгаш ортумак сайгарлыкчы чоруктуң хөгжүлдезинге таарымчалыг байдалдарны тургузар

Тываның Баштыңы Владислав Ховалыг Кызылдың Үлетпүр парыгында, 2020-2024 чылдарда социал-экономиктиг хөгжүлдезининиң амы-хууда программазының шугуму-биле регионнуң чазаандан деткимче алган сайгарлыкчыларның бүдүрүлге объектилерин хынап четкен.

Тываның Баштыңы парктың шупту бүдүрүлгелери чаа ажылчын олуттарны тургузар болгаш тус чер бюджединче үндүрүг дадывырларын киирер хүлээлгелерни бодунга хүлээнип алганын сагындырган. Владислав Ховалыгның барып чорааны ийи чаа участокта 36 кижи ажылдап турар, чоокку үеде немей 32 ажылчын олут ажыттынар.

Владислав Ховалыг «Сергеихинский текстиль» КХН-ниң болгаш «Селера-Т» ААН-ның бүдүрүлгелеринче кичээнгейни углап, ында ажылдың чорудуун база көрген.

«Сергеихинский текстиль» компания дүктүң бирги болбаазырадылгазын организастаар инвестиция төлевилелдериниң шилилдезин эрткен соонда, деткимчени алган. Дүктүң бирги болбаазырадылга цеги, өйлеп-таарыштырар дериг-херекселдерниң шенелдези чедиишкинниг болган.
Амгы үеде 24 ажылчын олутту тургускан, бо чоокку үеде ол көргүзүг ийи катап өзер. Компания бо чылын чондан 500 тонна дүктү садып алган. Аштап чуп, аңгылаан чиг этти белен продукция алырынга улаштыр болбаазырадыр. Ам компанияның планында Тывада дүктү элээн хандыр болбаазырадыр немелде шугумну ажыдары кирип турар.
Дүктүң баштайгы болбаазырадылга цеги республикага чугула ужур-дузалыг. Бистиң малчыннарывыс мооң мурнунда октаттынып турган чиг эдин садып-саарып алыр аргалыг апарган» – деп, Владислав Ховалыг демдеглээн. Оон аңгыда компания чурттуң өске регионнарында технологтуг четкиже кирип, Тывада болбаазыраткан шынарлыг чиг этти дүк продукциязының бүдүрүлгелеринче чорудуп эгелээрин чугаалаан.

«Селера-Т» компаниязы КХН – Тываның Баштыңының ийи дугаарында барган бүдүрүлгези. Компания регионалдыг рынокта офис болгаш бажың эт-севиниң улуг хандырыкчыларының төлээзи кылдыр шагдан тура билдингир. Чоорту боттарывыс бүдүрүлгеже шилчидивис» компаниязы деп, Владислав Ховалыг чугаалаан. Социал-экономиктиг хөгжүлдезининиң амы-хууда программаның акша-хөреңгизиниң ачызында Кызылдың үлетпүр парыгының девискээринге бүдүрүлге объектизин тудуп, амгы үениң технологтуг дериг-херекселдерин, ооң иштинде ыяштан кылыглар продукцияны бүдүрер автоматчыткан машиналарны садып алган. Ноябрьда мебель цеги ажылдап эгелээн. Бо хүнде компания офис болгаш бажың эт-севин бүдүрүп турар.

“Биче база ортумак сайгарлыкчы чорук болгаш хууда сайгарлыкчы эгелээшкиннерни деткиири” Национал төлевилел-биле Тываның найысылалында, хоорайның үлетпүр девискээринде 60 гектар ниити шөлдүг участокта, республикада бирги үлетпүр парыгы 2020 чылда ажыттынган.

Парктың кол сорулгазы – чаа ажылчын олуттарны тургузары, үндүрүг орулгаларын көвүдедири, тус черде бүдүрген тудуг материалдарын ажыглап тургаш, тудуг ажылдарының өртээн эвээжедири, биче болгаш ортумак сайгарлыкчы чоруктуң хөгжүлдезинге таарымчалыг байдалдарны тургузары, ол ышкаш регионнуң ниити продуктузу болгаш ында бүдүрүлгениң үлүүн улгаттырары болур.

Амгы үеде паркта 11 бүдүрүлге бар, чамдыызы бүдүрүлгезин эгелээн, а артканнары ажылдаарынга белеткенип турар. Парктың девискээринде аңгч-аңгы тудуг материалдарын бүдүрер, чижээ, хана панельдери, профнастилдер, тууйбу, шуткаан продукция, ыяш материалдары, арболит блоктар, тротуар плиталары бүдүрер, ыяш болбаазырадыр цехтер база ажыттынар.