Хову-Аксында тускай шериг операциязының киржикчизи, гвардияның биче сержантызы Буян-Кежик Монгушка тураскаал баннерни тургусканын чагырга чери дыңнаткан.
Маадыр Кызыл хоорайга төрүттүнген, ооң чашкы болгаш чалыы үезиниң эң эки чылдары Хову-Аксынга эрткен. Тус черниң школазын 2020 чылда дооскаш, ол Кызылдың башкы колледжинге өөренир деп турган. Ынчалза-даа чүрээниң кыйгызы-биле Ада-чуртунга бараан болурун шилип алган. Эгезинде ол шериг келдириишкини езугаар албан-хүлээлгезин эрттиргеш, ооң соонда керээ чарып алган.
2022 чылдың март айдан эгелеп Б-К.А. Монгуш 46102 шериг кезээниң (Бикин хоорай) составынга мурнуку одуругга, халдаашкын отрядының мотоадыгжы салбырының шыгаакчызы болуп, шериг албан-хүлээлгезин эрттирип турган. Ооң тулчуушкунга эрес-дидим чоруун демдеглеп, аңаа биче сержант эргени тывыскан.
Маадыр Хабаровскунуң госпиталынга аар балыглангаш, үр үеде эмнедип турза-даа, ол төрээн чуртун камгалаарын уламчылаар дээш, дайынчы эштеринче боданмайн-даа ээп келген.
2025 чылдың март 31-де Буян-Кежик Монгуш езулуг маадырлыг чоруун көргүскеш, амы-тынындан чарылган.
Маадырны Эрес-дидим чоруктуӊ ордени-биле мөчээн соонда шаңнаан. Ол «Дайынчы шылгарал дээш», «Дайынчы эрес-дидим чоруу дээш» медальдарның эдилекчизи.
