Чуртувустуң эӊ-не кол болгаш ыдык байырлалы – Улуг Тиилелгениң хүнүнге чедир каш-ла санныг хонук арткан.
Бии-Хем кожууннуң Аржаан сумузунда ном санының эргелекчизи Чойган Тюлюш Улуг Тиилелгениң 80 чыл оюнга база Ада-чурт камгалакчызының чылынга тураскааткан хемчеглерни доктаамал эрттирип турарын чагырга чери дыңнаткан.
Бо удаада ном саңының ажылдакчызы "Аленушка" уруглар садының чаштарынга Ада-чурттуң Улуг дайынының киржикчилеринге тураскаалче болгаш тускай шериг операциязының маадырларының сактыышкын ханазынче экскурсияны чорудуп, эрес-дидим камгалакчылар тиилелгени кандыг өртек-биле чедип алганынының дугайында таныштырган.
Бичии аржаанчылар сактыышкын езулалынга киржип, чечектерни тураскаал баарынга салып, кажыыдалдың минутазында маадырларның чырык адын сактып, мөгейгеннер.
Аржаан школазының өөреникчилери «Георгий кожаазы» бүгү-российжи акцияга каттыжып, идепкейлиг киришкеннер. Школачылар Тиилелгениң демдээ – георгий кожаазын чаңгыс чер чурттугларынга үлээн.
