Тус-чер бот-башкарылга хүнүнде Бии-Хем кожууннуң “Туран” сыын ажыл-агыйының девискээринге муниципалдыг албан-хаакчылар аразынга спортчу оюннар болуп эрткен.
Спартакиадага Туранның болгаш кожууннуң суму чагырга черлериниң командалары хөглүг старттарга, аргамчы тырттарынга, биче бүт бөмбүүнге, бот-тывынгыр уран чүүлге көрүлделерге, черниң уг-шиин тыварынга маргылдашкан. Киржикчилер дүрүг сигенни безин артап турганнар.
Спортчу оюннарның түңнелдери-биле Өөк сумузунуң командазы бирги черге төлептиг болган. Ийиги черни Сөөш суму чагыргазының, үшкү черни Сесерлигниң командалары чаалап алган. Тус-тузунда тиилекчи болган спортчуларны база шаңнаан.
Бии-Хем кожуун чагыргазының даргазы Күдер Монгуш Туран база суму чагырга черлериниң удуртукчуларынга болгаш ажылдакчыларынга тус-чер бот-башкарылга хүнүн таварыштыр байыр чедирип, спартакиаданың тиилекчилеринге хүндүлүг бижиктерни, белек-селектерни тыпсып, шаңнап-мактаан.
Келир чылын маргылдааны Туран хоорайның чагыргазы эрттирерин хүлээнип алган.
