Бии-Хем кожууннуң Аржаанда "Алёнушка" уруглар садынга 4-6 харлыг уруглар аразынга кожуун чергелиг шыдыраа маргылдаазы болуп эрткенин чагырга чери дыңнаткан.
Бичии шыдыраачыларның оюнун Аржаан школазының күш-культура башкызы Тимур Дапы шииткекчилеп эрттирген.
Маргылдааның түңнелдери-биле Туранның бир дугаар уруглар садындан Ачыты Ондар биле Даваа-Доржу Монгуш бирги-ийиги черлерни чаалап алган. «Алёнушка» уруглар садының кижизиттирикчилери Ай-Демир Арсарык биле Шеңне Куулар үшкү-дөрткү черлерге төлептиг болган.
Шыдыраа маргылдаазынга уруглар садтарының кижизиттирикчилери идепкейлиг киришкен. Тиилекчилер шаңнал-макталды алган.
Чоокта чаа "Алёнушка" уруглар садында шыдыраа бөлгүмү ажыттынган. Школа назыны четпээн уруглар өөредир албан чериниң коллективи маргылдааны бедик деннелге эрттирген. Бичии шыдыраачыларның деткикчилери – Буян Борисович, Оюмаа Геннадьевна, Солангы Владимировна.
Тываның Баштыңы Владислав Ховалыгның грант деткимчези-биле «Уруглар садтарынга – шыдыраа» төлевилели боттанып эгелээнин сагындыраал.
