Тыва «Билиг.Чырыдыкчылар» төлевилелди эгелээн регионнарның бирээзи. Чуртта идепкейлиг лекторлар ниитилелин тургузарынче ол угланган. Өөредилге программазындан аңгыда, спортчу болгаш культурлуг хемчеглер киржикчилерни хаара тудар.
Республиканың лекторлар ниитилежилгезинге Дөгээ даанче үнүүшкүн бир дугаар каттышкан хемчег болган. 18 чырыдыкчы болгаш ЦСКА-Тываның 22 кижизиттирикчизи аңаа киришкен.
«Хемчег солун болгаш хөглүг эрткен. Спорттан аңгыда, ажыл планнарын, идеяларны, чаа арга-хевирлерни сайгарып көрдүвүс. Бо дээрге команданың хей-аъдын быжыглаарынга болгаш профессионал эгелээшкиннерни сайзырадырынга эң-не эки арга-дыр. Спортчу ужуражылгаларны ай санында эрттирер деп шиитпирледивис. Бо чүүл бистиң командавысты быжыглаар дээрзинге бүзүрээр мен» – деп, «Билиг» ниитилелиниң Тывада филиалының директору Эмина Кызыл-оол чугаалаан.
Дөгээ туристерни-даа, тус черниң чурттакчыларын-даа хаара тудуп турар, Тывада турисчи сонуурганчыг чер деп билдингир. Дагның бажындан Улуг-Хемниң эгезин алган Бии-Хем биле Каа-Хем хемнерниң белдиринде девискээрниң бойдус чурумалдыг девискээрин көрүп болур. Сөөлгү чылдарда Тывада улусчу ужурлар болгаш шажынчы сүзүк-чүдүлгениң катап дирилгени-биле, Дөгээ даа буддизмниң ыдыктыг чери апарган.
«Шупту чырыдыышкын ажылдарында киржип, өскелерниң хей-адын чаа аргалар база дуржулгалар-биле киискидип чоруур бис. Чамдыкта сорук киирер чаа кижилер-биле таныжып, үени хөглүг эрттирер хемчеглерге киржири, оларга ажыктыг. Республикада ындыг хемчеглер эртип турары дыка эки-дир» – деп, «Билиг» ниитилелиниң лектору болгаш оратор уран чүүлүнүң башкызы Любовь Ичин-Норбу чугаалаан.
Билиг.Лектор төлевилелдиң бешки сезонунче билдириишкиннерни июль 15-ке чедир («Аныяк лектор» номинацияга – июнь 30-ге чедир) албан езузунуң сайтызындан хүлээп ап турарын сагындыраал. Улуг улус «Билиг» ниитилелдиң 100 кижи-биле чарар 100 муң рубль өртектиг керээзи база өртектиг шаңналдар дээш демисежир. База ол ышкаш мөөрей шылгалдаларын чедиишкинниг дужааган чүс школачыларны делегей чергелиг уруглар төвү «Артектиң» сменазынче чалаар (өөреникчилер «Артекке» чылда чаңгыс катап кээр).
Билиг.Лектор дээрге регион бүрүзүнде салым-чаяанныг чырыдыкчыларны илередип, ол адырда оларның профессионал өзүлдезинге аргаларны тургузарынга дузалаар бүгү-российжи мөөрей-дир. Дөрт чыл дургузунда мөөрейге Россияның 89 регионундан 41 муң кижи киришкен, киржикчилер 14 муң ажыг лекцияларны номчаан.
