Бир хойну сес минута дургузунда кыргаан

Гена Хомушку Бай-Тайга кожууннуң Бай-Талда кыргылда пунктузун эрткен чылын ажыдып алган. Амдыызында ол өшкүлер кыргып турар. Бо хүнге чедир беш кодан малды кыргып каапкан.

«Социал керээ» программазының 2021 чылдын киржикчизи күрүнениң деткимчези-биле электрилиг кыргылда машиназын, ук херекселди октаар движокту садып алгаш, чымыштыг ишче шымныгып кирипкен.

Кыргыкчыны малчыннар, араттар социал четкилерде чарлал таварыштыр чалап ап турар. Гена шээр мал кыргылдазынга ажыглаар херекселдери-биле чепсегленип алгаш, аалдар кезип, ажылдап чоруптар. Бүдүн кодан хойну (800 хире баш) бир хүн ажыр кыргыыр.

Бай-Тайга кожууннуң Чонну ажылга хаара тудар төвүнүң директору Шеңне Күжүгет Генаны барыын кожууннарның муңчу малчыннары безин чалаарын онзалап демдеглеп турар. «Социал керээ» программазынга киржир мурнунда-ла Гена малчыннарга ачы-дузазын чедирип турган. Ынчан ол хол хачызы-биле хой, өшкүнү кыргып турганын Шеңне Күжүгет чугаалады.

– Эрткен чылын комиссия мээң төлевилелимни чүүлдүг деп көрген соонда, хууда ажыл-херээм эгелээним ол. Амгы үеде суурумда малчын турлагларда өшкү кыргып тур мен – деп, Гена Хомушку ажылын таныштырган.

Социал деткимче алыкчызы эрткен чылын Чонну ажылга хаара тудар төп таварыштыр Тываның көдээ ажыл-агый техникумунга ветеринария салбырынга кыргыкчы курстарын эрткеш, шынзылганы алган. Гена Хомушку ол ынчан хой кыргыырынга рекордту тургускан. Бир хойну сес минута дургузунда кыргаан. Социал четкилерде ооң ажылын чон бедии-биле үнелеп, дендии шалыпкын кыргыкчы деп бижип турарлар.