Уругларны бирги классче апрель 1-ден тура бижидип эгелээрин ТР-ниң Өөредилге яамызы дыңнаткан.
Бирги чада апрель 1-ден июнь 30-ге чедер. Уругну чурттап турар чериниң аайы-биле бирги классче бижидер. Оон аңгыда бирги чергеде школаже бижиттирер эргезиниң дугайында шынзылганы көргүзер.
Ийиги чада июль 6-дан хостуг олуттар долгуже чедир үргүлчүлээр. Бо чада боттарының девискээринде быжыглаттынган школа чанында чурттавайн турар уругларга көрдүнген. Школаларда хостуг олуттарже сентябрь 5-ке чедир уругну бижиттирип болур.
Бо чылгы хүлээп алыышкын кампаниязының үезинде өөредилге албан черлеринче бирги чергеде бижиттирер чаа категорияның хамаатыларын кииргенин сагындыраал. Ол дээрге шериг албан хаакчыларының, тускай шериг операциязының эки турачылары база тускай шериг операциязының үезинде амы-тынындан чарылганнарның уруглары болур. Ынчангаш өөредилге организацияларының удуртукчулары уругларны бирги классче бижиттирериниң документилерин хүлээп тура, ук категорияның хамаатыларын кичээнгейге алыры чугула.
Тываның Баштыңы Владислав Ховалыг кожууннарның удуртукчуларынга бирги классче кирер уругларның баш бурунгаар тодараткан санын ам-даа сайгарып, школа назыны четкен уругларның санын ылаптап, чаа туттунган бажың, кудумчуларлыг девискээрлерни кезиирин дааскан.
«Бо чылдың сентябрь 1-де ыраккы Каа-Хемге болгаш Кызыл хоорайда «Спутник», «Мөңгүн» микрорайоннарга чаа школалар ажыттынар. Чаа школаларга башкыларны база өөреникчилерни комплектилээри чугула» – деп, Владислав Ховалыг демдеглээн.
2025-2026 өөредилге чылында бирги классче 6 268 хире уруг кирери билдингир, оларның хөй кезии уруглар садтарының доозукчулары болур.
Уругну бирги классче бижидерде, ада-ие Күрүне ачы-дузазының порталы азы почта харылзаазының операторларын таварыштыр чагаа-биле билдириишкинни чорудуп болур. Ол ышкаш школага четкеш, билдииришкинни киирип болур.
Бирги классче уругну хүлээвээн таварылгада ада-ие кожууннуң өөредилге эргелелинден азы Кызыл хоорайның өөредилге департаментизинден (Кочетов кудумчузу, 137, каб. 15) тайылбырны алыр. Кызыл хоорайның ада-иелеринге өөредилге департаментизи «изиг шугум» телефонун ажыткан: 8 (39422) 3-31-10, ажыл шагында долгаар.
