ТР-ниң Өөредилге яамызының дыңнатканы-биле алырга, бо чайын республикада школачыларның чайгы дыштанылга үезинде уругларның идепкейлиг, ханы уткалыг болгаш айыыл чок хостуг үезин хандырар сорулгалыг 200 ажыг түр үениң дыштанылга төвү ажыттынып, график езугаар халас ажылдаар.
Яамының шугуму-биле немелде өөредилге шөлдеринге 18 түр үениң дыштанылга төвү ажылдап, 7-ден 17 хар чедир назылыг 1200 ажыг школачыларны хүлээп алыр. Уругларга чуруп, чазаныр бөлгүмнер ажылдаар, спортчу хемчеглер эртер, аңаа эш-өөрнү тып, чаа чүүлдерни билип алыр аргалыг. Хемчеглер мөзү-шынар кижизидилгезинче, угаан-медерел, бүгү талалыг чогаадыкчы сайзыралче болгаш кадыкшылгаже угланган.
Спортчу объектилерге түр үениң 30 төвү ажылдаар: спорт школалары болгаш «Эзирлер уязы» 1200 хире уругну хүлээп алыр. Эртенги сула шимчээшкиннерни, хол болгаш бут бөмбүү, шыдыраа, мячилиг хоккейни программаже киирер. Уруглар «Күш-ажылга болгаш камгалалга белен бол» деп күш-культура шылгалдаларын дужаарынга белеткенип, солун мөөрейлерге болгаш янзы-бүрү угаан оюннарынга киржип, кады кинолап, национал оюннарны шиңгээдир.
Оон аңгыда арга-арыгга, оруктарга, суг объектилеринге айыыл чок чорук дүрүмнериниң дугайында ажыктыг чугааларны кылыр. Кадык амыдыралдың, бойдустуң болгаш экологияның дугайында хөйнү билип ап, чурук мөөрейлеринге киржир. Оон аңгыда Ада-чурт камгалакчызының чылынга база Ада-чурттуң Улуг дайынынга Тиилелгениң 80 чыл оюнга тураскааткан темалыг хемчеглерни организастаар.
Культура албан черлери – ном саңнары болгаш культура төптери база бажыңнарынга түр када дыштаныр 141 төп ажыттынар, аңаа 7900 хире уруглар дыштаныр. Оларга ада-чуртчу, мөзү-бүдүш кижизидилгезин болгаш кадык амыдыралды суртаалдаарынче угланган 7 муң ажыг культурлуг болгаш дыштанылга хемчеглери планнаттынган. Оларның чамдыызын «Баштайгыларның шимчээшкини» регионалдыг салбыр-биле кады эрттирер.
Бо чылын республиканың Кызыл, Таңды, Улуг-Хем, Бии-Хем база Чеди-Хөл кожууннарда өг-бүлеге болгаш уругларга социал дуза төптеринге беш дыштанылга чери ажыттынар. ТР-ниң Күш-ажыл яамызының дыңнатканы-биле, ортумак болгаш үстүкү школа назылыг уругларны хүндүскү лагерьлер манаар. Түр үениң дыштанылга төптеринге кээр 270 школачыга Ада-чурттуң Улуг дайынынга Тиилелгениң 80 чыл оюнга тураскааткан өөредилге программазын белеткээн.
Бо чылын «Алгоритмика» чайгы хууда школа, республиканың лицей-интернадынга чайгы математика школазы, Иван Ярыгин аттыг спорт комплекизи, «Индиго» немелде өөредилге төвү, К.Б. Ондар аттыг Тыва культура төвүнде «Чайлаг» лагери түр үениң дыштанылга төптериниң даңзызынче киргенин, яамызы дыңнаткан.
Чайгы үеде түр үениң дыштанылга төптерин организастаанының ачызында, Тываның школачылары дагдыныкчыларның хайгааралы-биле хүн бүрүде чаа чүүлдерни билип ап, мага-бодун сайзырадып, ынак спорту-биле ойнап, солун бөлгүмнерге болгаш чогаадыкчы мастер-класстарга барып, аңгы-аңгы мөөрейлерге киржир аргалыг. Республикада 13 муң хире чашты болгаш элээдилерни организастыг дыштанылганың бо хевиринге хаара тударын баш бурунгаар санаан.
