Тываның Баштыңы Владислав Ховалыг Кызылда база Кызыл кожууннуң девискээринде элээн каш тудуг шөлдерин эргий хынаан. Бир дугаарында Каа-Хем суурда спортчу-культура төвүнүң тудуунга четкен. Тываның Баштыңы тудуг ажылдарын база шынарын үнелеп көөрү-биле шак ындыг хевирлиг хыналдаларже сагындырыг чокка үнүп турар.
– Каа-Хем суурда он чыл бурунгаар эгелээн спортчу-культура төвүнүң тудуун доозары чугула деп билир болгаш, ында-хаая ынаар чедерин кызыдып, ажылчыннарның барын көөр дээш, сагындырбайн бо-ла чедер мен. Шынап-ла тудугжулар чедишпес-тир. Ындыг-даа болза, тудуг шимчеп турары көскү – деп, Владислав Ховалыг хыналданың түңнелдери-биле соцчеткилерде үлешкен.
Тываның Баштыңы объектиге чорда, шеверлел ажылдары чоруп турган. Иштики ажылдар доосту бээрге-ле, төптүң девискээрин чаагайжыдып эгелээрин тудугжулар дыңнаткан.
2013 чылда тудуп эгелээн Тывага онзагай – улуг ареналыг, хөй ажыглалдыг объект боттуң акша-хөреңгизи чогундан база републикага нарын экономиктиг байдалдар уржуундан, тудуг ажылдары 2015-2017 чылдарда турупкан, ынчалдыр объектини дужаарының хуусаазы каш катап соңгаарлатттынган.
ТР-ниң Спорт яамызы «кыраан тудугну» «Демография» национал төлевилелдер объектизинче киирерин чедип алган соонда, спортчу инфраструктура объектилерин тудар болгаш эде чаартыр сорулгалыг «Спорт – амыдыралдың чаңчылы» регионалдыг төлевилел боттандырылгазы-биле эрткен чылын тудуг ажылдары катап эгелээн.
Тудуг объектизин доозарынче национал төлевилел чорудуу-биле 300 ажыг сая рубльди ийи чылда хуваай үлээн. 2023 чылда 230 ажыг сая рубль субсидияны тускайлаан, ооң 229 сая рубльди федералдыг бюджеттен болза, 2,3 сая рубллди республика казназындан кады акшалындырган. Ол акша-хөреңгиге тудугнуң даштын тудуп дооскан. Бо чылын төптүң инженер четкилерин туткаш, ооң девискээрин чаагайжыдар.
Спортчу-культура төвү «Преображенский» чаа чуртталга микрорайонунуң чоогунда болганындан, ол ышкаш регионнуң национал төлевилелге киржилгези бо хире улуг объектиниң инженерлиг коммуникацияларын тудар айтырыгны 2023 чылда шиитпирлепкен.
ТР-ниң Тудуг яамызы чуртталга комплекизин тудар планда көрдүнген чуртталга бажыңнары биле социал объектилерни төпчүткен суг хандырылгазы-биле хандырар суг чыыр черни тударынга «Чуртталга болгаш хоорай хүрээлеңи» национал төлевилел-биле 500 ажыг сая рубльди камгалап алган. Бо хүннерде суг чыыр черде тудуг кидин түлүк.
Бо чылдың төнчүзүнде спортчу-культура төвүнүң тудуун доозары планнаттынган.
