Тываның Орук-транспорт яамызының дыңнатканы-биле алырга, бо чылын «Чуртталганың инфратургузуу» национал төлевилелдиң, «Көдээ девискээрлерниң комплекстиг хөгжүлдези» база «ТР-ниң транспорт системазының хөгжүлдези» күрүне программаларының боттандырылгазы-биле орук ажылдарын чорудар. Ниитизи-биле 156,62 километр орук участогунуң эде чаартылгазынче 44 хемчег планнаттынган. Ынаар ниитизи-биле 270 метр узун ийи көвүрүгнү база 156,35 километр узун 42 орук участогу кирген.
Күрүне программазының күүселдези езугаар Кызылдың девискээринде беш километр ажыг сес орукту, а регионалдыг автооруктарда – 150 километрден узун 17 участокту, ооң иштинде көдээ девискээрлерде үш километр оруктарны септээри планнаттынган. Ол ышкаш 7,5 километр хире шөйлү берген кудумчуларже чырыкты киирери көрдүнген.
2025 чылда Хадың биле Тээли суурларже кирер оруктарны, «Копту-Аксы – Тоора-Хем» база «Мугур-Аксы – Кызыл-Хая» автоорук участоктарын, «Бүрен-Аксы – Элегес-Аксы – Кунгуртуг» автокыштагдан Сизим суурга чедир участокту, Хадың биле Дус-Хөл хөлдерже кирер оруктарны чогуур байдалче киирерин планнаан.
«Чуртталганың инфратургузуу» национал төлевилел-биле ажылдарны кылыр. Энергетиктер, Чургуй-оол, Колхозная кудумчуларга база Вавилин ээтпээ микрорайонда Кара-Хаак суурже чедер орукту бир дугаарында кылып эгелээр. «Восток» база «ДСТ» кызыгаарлаан харыысалгалыг ниитилелдер – тудуг организациялары 2025 чылдың апрельдиң баштайгы он хонуунда белеткел ажылдарынче кирген.
Айыттынган орук участоктарында амгы үеде орук ажылдарының элээн чадалары кылдынган: асфальтының кырыкы каъдын адырып, сай-довуракты төккен, Энергетиктер кудумчузунда орукту асфальтылап турар. Национал төлевилел-биле септелге ажылдарында 40 хире ажылчын, 25 санныг тускай техника хаара туттунган.
Чурттакчы чоннуң дилээ болгаш Тываның Баштыңы Владислав Ховалыгның аңгы даалгазы езугаар септээр объектилерни шилип алганын Тываның орук-транспорт сайыды Шораан Чыргал-оол демдеглээн. Тудуг организациялары участоктарга кылыр ажылдарының графигин, тодаргай хуусаазын тургузуп, дугурушкаш, аттарны салган. Оон аңгыда объектилерде ажылдың чорудуун хынаар куроторларны база томуйлаан.
“Хандагайты” эрттирилге пунктузун эде чаарткан тудуг-эптээшкин ажылдарын доозуп, ону хөй талалыг чурумга ажылдадырынга, Баян-Кол суурже Улуг-Хемни кежир көвүрүг тударының төлевилел-санаашкын документилерин ажылдап кылырынга, ол ышкаш Кызылдың аэропорт комплекизин сайзырадырынга, автомобиль транспортунуң пассажирлер аргыштырылгазынга хыналданы хандырары – бо чылда яамының мурнады боттандырар угланыышкыннарының аразында.
