Бо чылын беш көдээ почта салбырын чаартыр

Эрткен чылын Тывада сес почта салбырларын нормативтиг байдалга дүүштүр эде чаартырынга федералдыг бюджеттен 36 сая рубльди үндүрген.

Тыва Республикада «Россияның почтазы» акционерлиг ниитилелдиң директору Владимир Ревенко, почта салбырларын эде чаартыр ажылдар 2023 чылда ам-даа уламчылаарын дыңнаткан.

Республиканың суурларында бештен эвээш эвес салбырларны хаара тудары планнатынган, ындыг болзажок бо ай төнчүзүнде төнчү даңзы билдине бээр.

Ыраккы Чөөн чүк шуулганынга Россияның Президентизи Владимир Путин көдээ суурларда болгаш чедери берге черлерде почта салбырларын эде чаартыр чугааны чорудуп, даалганы бергенин сагыдыраал. Ол сорулганы боттандырар дээш акционерлиг ниитилелдиң турум ажылдаарын арттырары-биле, федералдыг бюджеттен акша-хөреңгини тускайлаан. Программа боттаныышкынының бирги чылында, Россияның почтазы беш миллиард рубльди алгаш, чурттуң 77 субъектизинде 1195 салбырны чаарткан.

Владимир Ревенко республиканың чазаанга, Дээди Хуралга база «Чаңгыс демниг Россия» партиязының тус черде салбырынга төлевилелдиң регионда боттанылгазынче онза кичээнгейи болгаш эки үре-түңнелди көргүзеринге салдарын чедирген билдилиг хыналдазы дээш, четтиргенин илереткен.

– Амгы үеде Россияның почта харылзаазының талазындан ук программаны күүседир ажылдар ам-даа уламчылаар. Кураторларның деткимчези-биле бистиң объектилерде ажылдарны үезинде болурда, шынарлыг доостувус – деп, Ревенко чугаалаан.

Федералдыг Почта харылзаазының эргелелиниң төлээлери программада кирген тудуг объектилериниң төлевилел документиациязынга күрүне экспертизазын чорудар хуусааны кызырар аргазын көөрүнге дузалажырын регион эрге-чагыргазындан дилээн.

“Чаңгыс демниг Россия” партиязының регионалдыг салбырының секретарының бирги оралакчызы Каң-оол Даваа почта салбырларын эде чаартыр программа Партияның Улусчу Програмазының мурнады боттандырар угланыышкыннарының бирээзи болуп турарын, ынчангаш почтачыларга бүгү-ле херек чүүлдер-биле деткимче көргүстүнерин чугаалаан.

Ол ышкаш, бүгү ажыл чорудуунуң үезинде, киржикчилерге чогуур деткимчени көргүзер кылдыр Дээди Хуралдың депутаттарын эде чаартыр салбырга-ла быжыглаар.