Тывада уругларның чайгы дыштанылгазын айыыл чокка, солун кылдыр организастаар ажылдар чоруп турарын республиканың немелде өөредилге сайзырадыр төвү дыңнаткан.
Бо чылын 20 хире муң уругну чайгы дыштанылгаже хаара тудар планныг. Амгы үеде республиканың хүндүскү болгаш стационар лагерьлериниң материал-техниктиг баазазын база чайгы лагерьлерге ажылдаар улусту шилиир болгаш өөредир хемчеглерни чорудуп турар.
Тывага ниитизи-биле 159 хүндүскү, бир күш-ажылдың болгаш дыштанылганың, 21 стационар, ийи майгын лагери ажыттынар. Оон аңгыда Кызылдың 21 дугаар лицейинге, 22 дугаар школага, Аграрлыг лицейге, ыраккы Каа-Хемниң 3 дугаар школазынга, Сукпактың Б.И. Араптан аттыг школазынга, Хову-Аксының школазынга хүндүскү лагерьлер ажылдаар.
Бүгү-россияның болгаш Бүгү-делегейниң уруглар төптеринге бо чайын 99 уруг дыштаныр: «Артекке» – 40, «Океанга» – 20, «Орленокка» – 28, «Смена» – 9, «Алые паруса» – 2 уруг.
