Чедери берге Эржей суурда бир дугаар уруглар сады туттунуп турарын ТР-ниң Өөредилге яамызы дыңнадып турар. Эржей – Каа-Хем кожуунда эрги чүдүлгелиг чоннуң улуг сууру. Бо чылын аңаа 60 олуттуг уруглар сады эжиин ажыдар.
Улуг-Хемниң барык-ла эге бажында турар суурда, кажан-даа уруглар сады турбаан. Тудуг ажылдарын “Демография” национал төлевилелдиң “Ажылче хаара тудары-биле дузалаары” федералдыг төлевилели-биле чорудуп турар.
Чуртталга пунктузу Тываның найысылалы Кызыл хоорайдан база район төвүнден элээн ырак – тайгада. Орук аргыжылгазы чылдың үезинден база агаар-бойдус байдалындан хамааржыр, ынчалза-даа хүлээникчи тудуг организациязы график езугаар ажылдап турар. Бо хүнде сери шывар ажылдар дооступ, ооң-биле чергелештир иштики шеверлел ажылдарын кылыр турар.
– Эржей – хаялыг даглар болгаш чаагай чыттыг тайга-биле бүзээлеткен Каа-Хемниң иемдик эрии дургаар чаттылган эң-не улуг эрги чүдүлгелиг суур. Ынчангаш шак бо кайгамчыктыг черниң чаштарынга суурнуң төөгүзүнде бир дугаар уруглар садын тудуп турарывыс ол. Бо дээрге, суурнуң өөредилге инфратургузуунуң хөгжүлдезиниң эгези, чүге дизе чаш кижи бүрүзү школа назыны четпээн өөредилгени ыяап-ла алыр ужурлуг. Уруглар сады амгы шагның болгаш айыыл чок дериг-херекселдер-биле, чараш болгаш чырык эт-сеп, ойнаарактар болгаш кижизидикчилерге методиктиг материалдар-биле хандырттынар. Өөредилге чериниң ажыдыышкыны тус черниң чурттакчыларын ажылчын олуттар-биле база хандырар – деп, регионнуң өөредилге сайыды Алексей Храмцов демдеглээн.
Бо хүнге чедир ук суурда 300 хире кижи чурттап турар. Уруглар садынче кирери-биле электроннуг ээлчегде амдыызында 28 уруг бүрүткеттинген. Каа-Хем кожууннуң чагыргазы арткан уругларны электроннуг ээлчег системазынче киирери-биле ажылды чорудуп турар.
#Демография #Националтөлевилел #Өөредилгеяамызы #Каа_хемкожуун #Эржей #Уругларсадыныңтудуу #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
