ТР-ниң Капитал септелге фондузунуң дыңнатканы-биле алырга, 2025 чылда 129 558,40 дөрбелчин метр ниити шөлдүг хөй квартиралыг 44 бажыңны септээр, ооң 37-зи – Кызылда, 5-жи – Ак-Довуракта, 2-зи – Шагаан-Арыгда. Тываның Чазаа 2025 чылда септээр бажыңнарның даңзызынче хөй аалдыг ийи бажыңны киирген өскертилгелиг, үндезин септелге планын бадылаан.
2024 чылда Тывага үндезин септелге программазы-биле шупту 167 муң дөрбелчин метр шөлдүг, хөй квартиралыг 54 чуртталга бажыңынга септелгелерни чоруткан.
Сөөлгү үш чылда капитал септелге программазы-биле Тывада 101 хөй квартиралыг бажыңны септээн. Бажыңнар иштиниң инженер системаларын, лифт дериг-херекселдерин, серилерин болгаш даштын септээр ажылдарны чоруткан. Ажылчыннар бажыңның ниити саналга дериг-херекселдерин салып, үрелген артык кезектерин солуп, кирер черлерни чылыглаан.
Тываның найысылалы Кызылда эң хөй – хөй квартиралыг 44 бажыңны септээн. Оон аңгыда Ак-Довуракта дөрт, Шагаан-Арыгда беш, Хову-Аксы суурда бир бажыңнарны чаарткан. Үндезин септелге ажылдарынче ниитизи-биле 116, 27 сая рубльди чарыгдаан.
