ТР-ниң Чазак Даргазының оралакчызының хүлээлгезин күүседип турар Уран-оол Ондар база төлевилелдиң координатору, РФ-тиң Күрүне Думазының депутады Сергей Морозов Тываның Чазаа биле «Чаңгыс демниг Россия» бүгү-российжи политиктиг партияның федералдыг партия төлевилелиниң аразында кады ажылдажылга дугуржулгазынга атты салган.
Ат салган дугуржулга чаа үлетпүржүдүлгеге үндезилеттинген технологтуг, кадрлар болгаш угаан-медерел хамаарышпас чоруунга даянып, Россияның үлетпүр-технологтуг тергииделин деткиир дээш, «Бодуңнуун шилип ал» деп партия төлевилелин боттандырар сорулга-биле ийи таланың кады ажылдаарын көрген.
Россия Федерациязының Федералдыг Хуралының Күрүне Думазының регионалдыг политика болгаш тус чер бот-башкарылга талазы-биле комитет даргазының бирги оралакчызы, «Чаңгыс демниг Россия» партияның «Бодуңнуун шилип ал» федералдыг төлевилелдиң координатору Сергей Морозов ажыл-албан-биле республикага кээп чораан.
ТР-ниң Чазак Даргазының оралакчызының хүлээлгезин күүседип турар Уран-оол Ондар аалчыга байырны чедиргеш, республиканың кол макроэкономиктиг көргүзүглери-биле хуралдың киржикчилерин таныштырган. 2024 чылдың түңнелдери-биле социал-экономиктиг хөгжүлдениң бот-тускайлаң программазын боттандырганының ачызында, регион Национал инвестиция байдалының рейтингизинде бодунуң туружун беш черге экижидип, 34-кү черден 29-ку черже көдүрлүп келген.
Бүгү үениң дургузунда программа күүселдези-биле 1299 ажылчын олут тургустунган, бюджеттен дашкаар 20,5 млрд. рубль инвестицияны хаара туткан. Тудуг материалдарын бүдүрер адыр онза хөгжээн. 2024 чылда эт-сеп бүдүрер, дүктүң баштайгы болбаазырадылга цехтери ажылдап, «Чедер» санаторлуг-кадыкшылга курорт ажыттынган, сайгарлыкчы чорукту хөгжүдер чаңгыс аай төптүң ажылы эгелээн.
Туризм адырында 20 сайгарлыкчы төлевилелди база тудуг материалдарын бүдүрер үш төлевилел деткимчени алган. «Бистиң регионда бизнестиң хөгжүдезинче улуг кичээнгейни салып, хууда бизнести бүрүткедиринден эгелээш, бар компанияларны улгаттырарынга чедир бүгү-ле чадаларда деткимчени берип турар. Ол талазы-биле «Чаңгыс демниг Россия» партияның эгелээни регионнуң аъш-чем, технологтуг айыыл чок чоруун хандырарынче угланган «Бодуңнуун шилип ал» төлевилелди деткиир дээш, кады ажылдажылганы хөгжүдеринге барааннар болгаш ачы-дузаларын суртаалдаан сайгарлыкчылар болгаш хууда ажыл-агыйжылар-биле кады ажылдаарынга Тываның Чазаа сонуургалдыг» – деп, Уран-оол Ондар чугаалаан.
Сергей Морозов сөстү алгаш, чылыг-чымчак хүлээп алыышкын дээш өөрүп четтиргенин илереткеш, Кызылда элээн каш бүдүрүлге шөлдеринге болгаш «Амыдыралга инфратургузуг» национал төлевилелдиң күүселдези-биле чаагайжытканын хөй-ниити черлеринге барып чедип, «Субедей» спорт комплекизинде ажыттынган «Енисей Экспо» регионнар аразының делгелге-ярмарказын көргенин дыңнаткан.
«Губернатор албан-дужаалга ажылдаан арга-дуржулгалыг кижи болганымда, республика элээн бурунгаарлаашкыннарны кылганын демдеглексеп тур мен. Хөй санныг шөлдерни, хөй-ниити черлерин болгаш хемчеглерни кезидим. Хамаатыларының амыдырал-чуртталгазының шынарын экижидеринге «Чаңгыс демниг Россия» партияның эгелээни национал төлевилелдер улуг салдарны чедирип турарын көөр аргалыг болдум. Күжениишкинеривисти каттыштыргаш, «Бодуңнуун шилип ал» төлевилели-биле партия толевилелинин сорулгазы – Россияның технологтуг информация бот-догуннаашкынын чедип адыр ужурлуг бис» – деп, Сергей Морозов чугаалаан.
Тываның республика салбырының секретары, Тываның Баштыңы Владислав Товарищтайович Ховалыгның адындан “Бодуңнуун шилип ал” төлевилелдиң шупту чадаларын боттандырарынга «Чаңгыс демниг Россия» бүгү-российжи политиктиг партияның кежигүннери беленин Уран-оол Ондар чугаалаан.
«Чаңгыс демниг Россия» партияның даштыкыдан бараан киирерин солчуур болгаш үлетпүржүдүлге талазы-биле «Бодуңнуун шилип ал» төлевилели 2022 чылда эгелээн. Төлевилел элээн каш сорулгаларны салган: ажылчын олуттарны кадагалап арттырары, негелделерни боттандырары, чурттуң аъш-чем болгаш технологтуг айыыл чок чоруун хандырары.
Ат салган дугуржулга кады ажылдажылга харылзааларын хөгжүдеринче, регионнарның бүдүрүлге курлавырын деткииринче база партия төлевилелиниң сорулгаларын болгаш шиитпирлерин боттандырарынче Тыва Республиканы хаара тударынче угланган.
ТР-ниң экономиктиг хөгжүлде болгаш үлетпүр сайыды Аяс Баян – Тыва Республикада «Бодуңнуун шилип ал» партия төлевилелиниң Хөй-ниити чөвүлелиниң даргазы, а Тыва Республиканың Дээди Хуралының (парламентизиниң) депутады Аяс Мөңге – регионда төлевилелдиң координатору.
