«Өг-бүле» национал төлевилелдиң «Өг-бүлениң үнелиг чүүлдери болгаш культура инфраструктуразы» федералдыг төлевилел боттаныышкыны-биле Сүт-Хөл кожууннуң Бора-Тайга суурда культура бажыңында үндезин септелге ажылдары чоруп турар.
Тываның Баштыңы Владислав Ховалыгның даалгазы-биле, эвээш санныг чурттакчылыг черлерде көдээ культура бажыңнарының материал-техиниктиг байдалын экижидип, чок черлерде чаа культура бажыңнарын план езугаар тудуп эгелээн.
«Көдээниң чурттакчыларның культура-массалыг болгаш хөй-ниити ажылы культура одаанда эртип турар болганда, ооң материал-техниктиг байдалы улуг ужур-дузалыг» – деп, Владислав Ховалыг үндезин септелге чорудуун бодунуң блогунда дыңнаткан.
Барыын-Хемчик кожууннуң Эрги-Барлык суурда клубту, Тээли, Эйлиг-Хем, Дөң-Терезин суурларда школаларны эде чаартырынга шынчы тудугжу кылдыр бодун көргүскен хууда сайгарлыкчы Вячеслав Хуурактың бригадазы септелге ажылдарын кылып турар.
Төлевилел езугаар тудугнуң чылыдылга, суг хандырылга болгаш канализация системаларын, электри четкизин чаартыр, чаа өрт медээлээриниң болгаш видеохайгаарал системаларын, соңгаларны, эжиктерни тургузар. Объектиниң даштын база чаартыр.
– Кылыр ажылдар ам-даа хөй. Эрги шывыгларны шуптузун ап каапкаш, ханалар малгаштаар ажылдарынче кирдивис. Тудугнуң оран-савазын амгы үениң материалдары-биле шеверлээр. Керээ езугаар септелгени 2026 чылдың декабрьда доозар ужурлуг бис. Ындыг болзажок тудугну эртежик, бо чылын доозар дээш кызыдар бис – деп, Вячеслав Хуурак чугаалаан.
Клубтуң чаартылгазы «бот-тускайлаң чогаадыкчы коллективтиң репертуарынга чаа шиилер көстүп келиринге ол идиг бээр" – деп, Тываның Баштыңы идегелин илереткен.
Бора-Тайга культура бажыңында 1987 чылдан бээр Семен Сарыглар аттыг улусчу театр ажылдап турар, ол сүт-хөлчүлерниң культурлуг өнчүзү болур. Театрның тургусканы «Чарба, шляпа болгаш ынакшыл», «Иениң ынакшылы», «Таңды-Тывазының буянныг оглу – Буян-Бадыргы» деп шиилери Тываның көрүкчүлерге таныш дээрзин демдеглээлиңер.
