Сүт-Хөл кожууннуң Бора-Тайга суурда «Өг-бүле» национал төлевилелдиң «Өг-бүлениң үнелиг чүүлдери болгаш культура инфратургузуу» федералдыг төлевилел боттаныышкыны-биле культура бажыңында, «Аныяктар болгаш уруглар» национал төлевилел-биле школада үндезин септелге ажылдары чоруттунуп турар.
– Бо чылын нацтөлевилелдерниң күүселдези-биле Бора-Тайга суурда ортумак школаны болгаш көдээ культура бажыңын үндезини-биле септеп турар. Объектилерде тудуг ажылдары кидин түлүк.
Тываның Чазааның кежигүннери, сайыттар кожуунга доктаамал кээп, тудуг ажылдарын хынап, арга-сүмелерин кадып турар. Бо удаада тудуг сайыды Артыш Кыргыс сургакчылап кээп чораан. Ниитизи-биле септелге ажылдар эки чоруп турар.
Школада тудуг ажылдары графиктен мурнай чоруп турар. Объектини «Депшилге» кызыгаарлаан харыысалгалыг ниитилел хүлээнип алган. Участок даргазы Кежик Ондар. Культура бажыңын хууда сайгарлыкчы Вячеслав Хуурак эде чаартып турар.
Тудугжулар объектилерни үе-шаанда дужаар дээш кызымаккай ажылдап турар – деп, Сүт-Хөл кожууннуң чагырга даргазы Орлан Монгуш дыңнаткан.
Тываның Баштыңы Владислав Ховалыгның даалгазы-биле, эвээш санныг чурттакчылыг черлерде көдээ культура бажыңнарының материал-техиниктиг байдалын экижидип, чок черлерде чаа культура бажыңнарын план езугаар тудуп эгелээнин сагындыраал.
