Сүт-Хөл кожууннуң чагырга даргазы Орлан Монгуш кожуунга ТР-ниң культура сайыды Виктор Чигжит ажыл-агыйжы сургакчылаашкын-биле кээп чораанын дыңнаткан.
Сайыт Бора-Тайганың С. Сарыглар аттыг улусчу театрынга чедип, үндезин септелге ажылдарын хынап көрген. Септелге бо чылын эгелээн, культура объектизин 2026 чылда ажыглалче киирери планнаттынган.
– Бо чылын Бора-Тайганың көдээ культура бажыңының үндезин септелгези эгелээн. Объектини тудугжу чаңгыс чер чурттуувус, сайгарлыкчы Вячеслав Хуурак хүлээнип алган. Тудуг ажылдарының планын “Күртудугчагыг” күрүнениң казна албан чериниң төлээлери-биле чугаалаштывыс.
Кожууннуң төп культура бажыңынга немелде оран-саваны тудуп, музей ажыдары көрүнүп турар. Объектиниң төлевилел-дөзевилел документлерин кылдырып, чоокку үелерниң чаартылга планынче киирер деп шиитпирни хүлээп алдывыс.
Төп ном саңының оран-савазын улгаттырып, Ак-Даш клувунга улаштыр ном саңының тудуун кады кылырын дугуруштувус – деп, чагырга даргазы ужуражылганың түңнелдерин таныштырган.
