Таңды кожууннуң Суг-Бажы суурда Будда-парк сесерлиинге Паранирванаже чаларап чоруткан Будда Шакьямуни бурганның овур-хевирин мөңгежидип тургускан.
Байырлыг езулалга ТР-ниң Дээди Хуралының Даргазы Каң-оол Даваа, Тываның Камбы-Ламазы Гелек Нацык-Доржу, Тибеттен келген лама-башкылар, Таңды кожууннуң болгаш Кочетов суурнуң удуртукчулары, чүдүкчүлер киришкен.
Каң-оол Даваа сөс ап, Тываның Баштыңының даалгазы-биле чыылган чонга байыр чедирген. Суг-Бажы суурда шажын-сүзүк талазы-биле улуг болуушкун болуп турарын ол онзалап демдеглээш, мындыг тускай шажынчы сесерлик республикада хамаанчок, Россияда чок деп чугаалаан. Ол Ыдыктыг Улуг Башкы, Чырыткылыг XIV Далай-Лама 1992 чылда Тывага чораанының соонда, буддизмниң өөредилгези республикада күштелгенин, оон бээр хөй янзы ажылдар кылдынганын демдеглээн.
Будда бурганның Паранирванаже чаларап чоруткан овур-хевирин бо шажынчы сесерликке мөңгежидип тургаш, ажы-төлүвүске, ал-бодувуска болгаш чуртувустуң келир үезинге эки буян-кежикти бодарадып турар бис дээрзин сагындырган.
Суг-Бажы суурнуң Будда-парк сесерлиинде Ак болгаш Ногаан Дарийгилерни, биче Будданың овур-хевирин болгаш авыралдыг күштер мөөңнеттинген Субурганны чурттакчы чоннуң деткимчези-биле бо хүннерге чедир тургускан.
