Москвага Тываның Баштыңы Владислав Ховалыг киржилгези-биле Буддийжи өөредилге болгаш шинчилелдер деткиир фондунуң тургузукчулар чөвүлелиниң хуралынга, IV делегей чергелиг буддийжи шуулганга белеткелди сайгарып чугаалашкан.
Тываның Баштыңы шуулганның планын хурал үезинде чедиишкинниг камгалаанын бодунуң телеграм каналында дыңнаткан. Тускай мергежилдиглер командазы демниг ажылдаанының ачызында ол чедип алдынган деп, ол айыткан.
Владислав Ховалыг фондунуң чөвүлекчилер хуралынга, найысылал Кызыл хоорайның чаагайжыдылгазындан эгелээш, ажыл-агыйжы болгаш культура талазы-биле хүн чурумун тургузарынга чедир регионнуң амыдыралында аңгы-аңгы талаларын хаара туткан белеткел ажылы чоруп турарын таныштырган. «Бо чүгле болуушкун эвес, а улуг базым-дыр – Тываны шажын, культура болгаш эртем деңге сайзыраан, буддийжи ужур-чаңчылдарның дириг төвү кылдыр көргүзер арга-дыр – ол дээрге улуг базым болур» – деп, ол демдеглээн.
Удавас болур хемчегниң программазы деткимчени ап, бадылаттынган. Владислав Ховалыгның чугаазы-биле алырга, ажыл-агыйжы кезекте пленарлыг хурал болгаш угаан-медерел, экология, культура болгаш кадыкшылга тураскааткан дөрт шөл кирген. Культура блогунда 40 ажыг хемчегни планнаан.
Тываның Баштыңы болур улуг хемчегни эрттиреринге деткимчени көргүскен Буддизм өөредилгези болгаш шинчилелдеринге дуза көргүзер фондуга, Росконгресс фондузунга, Тыва Республиканың Камба-Лама эргелелинге, Тываның күрүне университединге четтиргенин илереткен.
Бо дөрткү шуулганның онзагай чүүлү – чуртта чарлаттынган Россияның чоннарының чаңгыс деминиң чылында болуп эртер. «Өске чурттардан эртемденнерге, чүдүкчүлерге, аалчыларга ажык бис. Россияда буддизмниң быжыг чөлеңгиижиниң бирээзи кылдыр Тыва бодунуң кайгамчык өнчү-салгалын делегейге бараалгадырынга белен» – деп, Владислав Ховалыг демдеглээн.
Эрткен чылын фондунуң чөвүлел хуралынга IV делегей чергелиг буддийжи шуулганны буддизм талазы-биле эртем хемчеглерин организастаарынга улуг дуржулгалыг апарган Тывага эрттирер дээн санал-оналды деткээнин сагындыраал. Ынчан Владислав Ховалыг бо делегей чергелиг болуушкун регионнуң сүлде-сүзүк болгаш политиктиг хөгжүлдезинге идигни бээр дээрзинге бүзүрелин илереткен: «Бөгүнде буддизм чүгле чоннуң сүлде-сүзүүн сайзырадырынга эвес, а политиктиг турум чорукту быжыглаарынга, ада-чуртчу кижизидилгеге, делегей харылзааларының аңгы-аңгы талаларын хөгжүдеринге улуг аргаларны бээр дээрзинге бүзүрээр мен» – деп, Тываның Баштыңы демдеглээн.
Оон ыңай, 2024 чылдың сентябрьда Россияның Президентизи Владимир Путин республикага кээп чорааш, регионнуң буддийжи ниитилелиниң шажынчы хемчегни эрттирер дээн эгелээшкинин деткээн. Шуулган он-он буддийжи чурттардан делегациялар болгаш чүдүкчүлерни хаара тудар.
Оон аңгыда, I база II делегей чергелиг буддийжи шуулганнар 2023 биле 2024 чылдарда Бурятияга эрткен, а үшкүзү Калмыкия Республиканың төвүнге 2025 чылда эрткенин демдеглээли.
Индия, Кыдат, Вьетнам, Таиланд, Мьянма, Шри-Ланка, Лаос, Непал, Моол, Бангладеш, Камбоджа база Бутан дээн ышкаш, даштыкы күрүнелерден делегациялар шуулганга киржир.
