«Буянныг чүрек» күрүне шаңналы: Ховар кезиишкин чоруткан үш эмчи

Тываның Баштыңы Владислав Ховалыг үш эмчиге ховар кезиишкиннери дээш «Буянныг чүрек» күрүне шаңналдарын тывыскан.

Тывада Кадыкшыл чылын хаап тура, республикада кадык камгалалының адырында «Буянныг чүрек» деп эң-не хүндүлүг шаңналын үш кезер эмчи алган.

“Кижиниң амы-тынын камгалап каан ховар кезиишкинни чорутканы дээш” деп угланыышкынга – Республиканың бир дугаар эмнелгезиниң рентген-хирургтуг диагностика болгаш эмнээшкин салбырының эргелекчизи, дээди квалификациялыг эмчи Сүгдер Бады, туберкулезка удур диспансерниң хирург эмчизи Мерген Монгуш база республиканың бир дугаар эмнелгезиниң чүрек-дамыр хирургу Артыш Ондар олар лауреаттар болган.

Республиканың бир дугаар эмнелгезиниң эмчизи Сүгдер Бадының ады республикага 2015 чылда-ла коронарлыг хан-дамырга стент салырының аргазын бир дугаар кииргени-биле нептереңгей апарган. Ол арганың ачызында аарыг кижилер республикадан үнмейн, амгы үениң эмчи дузазын ап турарлар. Эмчиниң кылган эң чугула кезиишкиннериниң бирээзи – бажынче хан чүгүрген аарыг кижиниң мээзиниң дамырларында ханның агымын катап тургусканы.

Мооң мурнунда республикага ындыг кезиишкиннерниң дыка нарынындан база эмчи дузазын чедирериниң үе-шагының кызыы болганындан кылдынмайн турган. Кезиишкин чокта, ындыг таварылгалар өлүмге чедирип турган. Кезиишкин чедиишкинниг болуп, каш хонук эрткенде, аарыг кижиниң хол-буттары шимчеп, чугаа-домаа үнүп келген.

Туберкулезка удур диспансерниң кезер эмчизи Мерген Монгуш Сүгдер Бады-биле кады база-ла аарыг кижиден бестиң дыка улуг кистазын ап кескени дээш, Тываның Баштыңындан хүндүлүг шаңналды алган. Тываның төөгүзүнде бир дугаар ындыг кезиишкин болганы ол.

Республиканың бир дугаар эмнелгезиниң чүрек-дамыр хирургу Артыш Ондар ол эмнелгеге ийи чыл ажылдааш, 136 ажыг кезиишкинни, ооң иштинде моюннуң болгаш буттуң дамырларынга улуг нарын кезиишкиннерни кылганы дээш лауреат атка төлептиг болган.

Артыш Ондар 2023 чылдың январь, май, июльда улуг дамырларның атеросклерозунга үш гибридтиг кезиишкинни республикада бир дугаар чедиишкинниг чоруткан. Кезиишкиннерниң сорулгазы – инсульт база ооң-биле холбашкан аар уржуктарны эвээжедири.

Бирги таварылга аар хан-дамыр аарыглыг кижиге хамааржыр, ол аарыг кижини инвалид болдурар. Кезиишкин чедиишкинниг болуп, тос ай эрткенде аарыг кижиниң кадыкшылы экижээн. Ийиги аарыг кижиниң дамырлары чиңгелээш, инсультка чедирип болур турган. Ол кижиге база улуг кезиишкинни чоруткан, ооң байдалы элээн экижээн. Үшкү кезиишкинни бажынче хан чүгүрген аарыг кижиге кылган. Ооң хан-дамырлары база бергедээн турган, ынчалза-даа кезиишкин соонда кадыкшылы экижип эгелээн.

Эмчи дузазын көргүзериниң негелделерге дүүштүр кижилерниң амы-тынын камгалаан, ооң иштинде бистиң республикада бир дугаар ажыглаттынып турар ховар кезиишкиннер – эмчилерниң профессионал хүрээлеңинде чаартыкчы арга-хевирлерни ажыглаан эмчилерге төлептиг үнелелди берген.