Эрзин кожууннуң школачыларының аразынга «Буянныг өг» деп мөөрей болуп эрткенин кожууннуң чагырга чериниң даргазы Шораан Шомбун дыңнаткан.
Шагаа байырлалынга тураскааткан оюн-тоглаалыг мөөрейге кожууннуң шупту школаларындан өөреникчилер идекпейлии-биле киришкеннер.
Уруглар тевек, шыдыраа, сыдым, панчык, кажык ойнаарынга болгаш өгге аалчы уткуур шылгалдаларга мөөрейлешкен.
Бирги черге Бай-Дагның школачылары төлептиг болган. Ийиги черни Нарынның, үшкү черни Мөренниң оолдар, уруглары чаалап алганнар.
Кожууннуң башкылары өзүп орар салгалга тыва езу-чаңчылдарны дамчыдып турарын Шораан Шомбун онзалап демдеглээн.
