Тывада бюджет акша-хөреңгизин чарыгдаары-биле холбашкан хоойлу хажыдыышкыннарының саны доктаамал эвээжеп турар. Регионалдыг саң-хөө болгаш бюджет хайгаарал албан чериниң начальниги Татьяна Монгуш республика чазаанга албан чериниң 2024 чылда ажылының түңнелдерин таныштырарда, ооң дугайында дыңнаткан.
Албан чериниң ревизорлары чылдың-на 55-60 хыналданы чорудуп турарын ол илеткээн. Хынаар ужурлуг бюджет акша-хөреңгизиниң хемчээли база ол-ла хевээр арткан – 4,5 млрд. рубль иштинде. Ынчалза-даа хоойлу хажыдыышкыннары элээн кызырылган. Бир эвес 2022 чылда оларны 1,9 млрд. рубль түңге илереткен болза, 2024 чылда 519 сая чедир, азы 3,6 катап эвээжээн.
Республиканың бюджединге чедирген когарал база ол-ла хире хемчээлге эвээжээн деп, Татьяна Монгуш тайылбырлаан. Ол чүгле хоойлуну сагыырынга эвес, а саң-хөө органнарынга корум-чурумну тударынга чугула. Ревизия хыналдазының ачызында бюджет акша-хөреңгизин чоннуң сонуургалдарынга болгаш республиканың хөгжүлдезинге чедимчелиг ажыглап турар.
Эксперттернии-биле алырга, чүгле ревизиялар эвес, хажыдыышкыннарны илередири эки түңнелдерни берип турар. Албан бюджет акша-хөреңгизин чарыыры-биле холбаалыг саң-хөө органнарының ажылдакчыларын, бухгалтерлерни болгаш өске-даа удуртукчуларны белеткээр улуг ажылды чорудуп турар. Ол садыглажылга үезинде акша-хөреңги айтырыын шиитпирлээрде частырыгларның санын эвээжедир. Арга-дуржулгадан алгаш көөрге, күрүне акша-хөреңгизин хууда ажык-кончаа бодаанындан эвес, а бюджет акша-хөреңгизин ажыглаарының хоойлуларын болгаш дүрүмнерин билбес болганындан, өске сорулгаларга чарыгдапкан болур.
