Тываның шупту 19 муниципалдыг тургузуглары 2026 чылда чаагайжыдар девискээрлерни шилиир онлайн-бадылаашкынга киржип турар. Тыва бүгү-российжи бадылаашкынче 69 объектини саналдаан, оларның аразындан 30 хөй-ниити шөлдери шилилдени эртер ужурлуг.
Чөөн-Хемчик биле Барыын-Хемчик кожууннар болгаш Ак-Довурак хоорай объектилери дээш бадылаашкынга эң идепкейлиг болуп, үннер саны-биле көргүзүгнү ийи катап ажырган. Сүт-Хөл кожууннуң төлевилелдери 101,3 хуу үннү алган.
Хожудаңгай чеди кожууннар санында – Таңды, Эрзин, Бай-Тайга, Кызыл, Тес-Хем, Өвүр, Тожу база Кызыл хоорай бар.
Боттарының объектилеринге хөй үннү алган кожууннар акшаландырыышкынын улгаттырар деткиишкинни алырын ТР-ниң Чазак Даргазының оралакчызының хүлээлгезин күүседип турар Айдыс Сынаа муниципалдыг удуртукчуларга сагындырган. А доктааттынган хемчээлди эртпээн муниципалдыг тургузуглар боттарының төлевилелдерин боттандырар аргазын чидирер.
