Тываның өөредилге сайыдының хүлээлгезин күүседип турар Ирина Биче-оолдуң удуртулгазы-биле ажылчын бөлүк Чөөн-Хемчик кожуунче үнүүшкүннү кылган регионнуң Өөредилге яамызы дыңнаткан.
Ирина Биче-оол кожуун чагырга чериниң даргазы Алексей Тюлюш-биле ажылчын ужуражылганы эрттирип, өөредилге системазының хөгжүлдезин база билиг шынарының айтырыгларын сайгарып чугаалашкан.
Өөредилге организацияларының удуртукчулары-биле ниити хуралга сайыт кожууннуң өөредилге билиин бедидеринче ажылдаарының чугулазын демдеглээн. Албан чериниң удуртулгазы школа директорларының кичээнгейин өөредилге чериниң инфраструктуразын чаартырынче база башкыларның билиг-мергежилин бедирери чугула, а ол ол дээрге өөредилгениң шынарын бедидер механизмниң пунктуларының бирээзи ол деп онзалаан.
Ол ышкаш харагалзал болгаш ажаалда-тежээлде, өскүс уругларны бажыңнар-биле хандырар айтырыглар база хажыызынга артпаан. Ниитизи-биле кожуунда 250 уруг даңзыда турар, оларның 96-зы өскүс уруг. Кожуунда уругларны азырап алыр талазы-биле айтырыг эки деп демдеглеттинген.
Бажың алыры-биле өскүс уруглар санындан даңзыда 382 кижи бар. Бо чылын бажың-биле дөрт кижи хандыртынган, чыл төнчүзүнге чедир немей алды кижи бажың алыр. 2023 чылда 13 бажың тудары планнаттынып турар. Ниитизи-биле 2013 чылдан тура 112 кижи бажың-биле хандыртынган.
Кожууннуң 15 школазында 4399 уруг өөренип турар. Школа назыны четпээн уругларның өөредилгезиниң адырында 13 уруглар сады бар. Бо чылдың төнчүзүнге чедир 60 олуттуг чаа уруглар садын ажыдар.
«Школа системазының өөредилгезиниң чаартылгазы» федералдыг төлевилелдиң чорудуу-биле Чадаананың 3 дугаар база Чыраа-Бажы суурнуң школаларынга үндезин септелгени чоруткан.
