Күш-культуржунуң хүнүнде Өвүр кожууннуң Сарыг-Хөл сумузу «Төрээн суурум» төлевилелдиң чорудуу-биле республика чергелиг хол бөмбуунге маргылдааны эрттиргенин чагырга чери дыңнаткан.
Кызылдың 18 база 26 дугаарлыг школаларының спорт залдарынга сумунуң тергиин хол бөмбүкчүлери болгаш чону маргылдааны бедик деңнелге эрттиргенин демдеглевес аргажок. Аңаа ырак-чооктан келген ойнакчылар база аарыкчылар өвүржүлерни чаңгыс демниг чон деп үнелээннер.
Тывада чарлаттынган Кадыкшыл чылынга тураскааткан маргылдаага 19 команда киришкен.
Бирги черге Чөөн-Хемчик кожууннуң Хөндергей сумузунуң (шаңналы дириг хой, 70 муң акша), ийиги черге Чөөн Хемчик кожууннуң Чыргакы сумузунуң (шаңналы дириг хой, 40 муң акша), үшкү черге Улуг Хем кожууннуң Арыг-Үзүү сумузунуң (шаңналы дириг хой, 30 муң акша) хол бөмбүкчүлери төлептиг болган.
«Тулган ойнакчы», «Тулган халдакчы», «Тулган камгалакчызы», «Тулган көдүрүкчү» тускай шаңналдарның эдилекчилеринге кубоктарны, 5000 акшаларны, хүндүлел бижиктерни тывыскан.
– Сарыг-Хөл сумузунуң чону демниин көргүзүп, ойнап келген оолдарывысты база эрттирикчилерни деткидилер. Чонумга чоргаарланып, черге чедир мөгеер-дир мен – дээш, сумунуң чагырга чериниң даргазы Аржаана Лопсан Өвүр кожууннуң чагырга чериниң даргазы А.А. Кууларга, сумувустуң куратору С.А. Сатка, чагырга черинде спорт федерациязының даргазынга четтиргенин илереткен.
