Чүс беш культура албан чери «Пушкин картазы» программада коштунган

Тываның Культура яамызының медеглээни болза, бөгүн республиканың 24 143 чурттакчызы пушкин картазын идепкейлиг ажыглап турар. Оларның хөй кезии регионнуң 14-ден 22 харлыг чурттакчылары, а 15 хире муңу – школачылар болгаш студентилер.

Бо чылын дөрт муң хире картаны чагаан. Республика база муниципалдыг 105 культура албан черлери, Алдан-Маадыр аттыг Национал музей, В. Көк-оол аттыг хөгжүм-шии театры, 66 культура ордузу болгаш бажыңы, 18 ном саңы, уран чогаадылганың үш өөредилге чери база ийи төп программада киржип турар.

Культура-дыштанылга албан черлерин болгаш төпчүткен ном саңының системаларын программага кожар ажыл уламчылавышаан. Программаның киржикчилеринге информация болгаш боттуг методиктиг дузаны көргүзүп, техниктиг кожулда талазы-биле тайылбырлыг өөредилгени организастаан.

Көрүкчү карта-биле төлеп алгаш, стационарлыг хемчеглерден аңгыда, чогаадыкчы коллективтерниң гастрольдарынче барып, культура албан черлериниң аныяктарга организастаан квестлерге, квизтерге, каткы-хөглүг оюн-тоглаарынга, чаа хевирниң өске-даа хемчеглеринге киришкен.

Тывада «Пушкин картазы» программа 2021 чылдың сентябрь 1-ден ажылдап эгелээн. Бо үе дургузунда республикада пушкин картазының ажыглакчылары 126 359 билетти садып алган. Бо чылын 853 хемчегже 53 муң хире билет саттынган.

Культура яамызының сайгарылгазындан алырга, В. Көк-оол аттыг хөгжүм-шии театрының шиилерин, «Саяннар» хөгжүм болгаш сам театрының, Тываның национал оркестриниң, В. Тока аттыг Симфониктиг оркестрниң концерттерин эң хөй кижи көрген.

Кинолар, делгелгелерге, аңгы-аңгы мастер-класстарга аныяктарның сонуургалы улуг. Республиканың концерт-театр албан черлериниң чаа чогаадыкчы сезону күзүн ажыттынарга, культура-массалыг хемчеглерге киржилге көвүдеп кээри билдингир.

Бо чылын коллективтер сезоннуң бирги оюн-көргүзүглери-биле республиканың кожууннарынче аъттанган. В. Көк-оол аттыг хөгжүм-шии театры тыва шүлүкчү Сергей Пюрбюнуң 110 харлаанынга тураскаадып, ооң төрээн чери Улуг-Хем кожуунга чаа театр сезонун ажыткан.
Тыва Республиканың Чазааның Үрер хөгжүм оркестриниң коллективи Тожунуң чонунга концерт программазын бараалгаткан.