Бөгүн тыва чонну бүгү делегейге алдаржыткан хөөмейжи база хөгжүмчү, Россияның алдарлыг артизи, Тываның улустуң хөөмейжизи, Тыва Республиканың өөредилгезиниң алдарлыг ажылдакчызы, Тыва үндезин культура төвүнүң үндезилекчизи болгаш баштайгы удуртукчузу Коңгар-оол Ондар аравыска чораан болза, 60 харлаар турган.
Тыва үндезин культура төвүнүң ажылдакчылары, ат-сураглыг хөөймежиниң өөреникчилери билдингир хөөмейжилер Коңгар-оол Борисовичтиң чырык адынга мөгейип, тураскаалынга чечектер салыр ёзулалды эрттирген.
Коңгар-оол Ондар ышкаш хөй талалыг салым-чаяанныг кижиниң дугайында төнчү чокка чугаалап болур. Тываның тѳѳгүзүнге, ылаңгыя культура адырынга балаттынмас исти арттырган, хөөмей-сыгыттың чүгле Тывага эвес, а бүгү делегейге сайзыралынга улуг идигни берген, харын-даа барыын чурттарже тыва хөөмейжилерге орукту ажыткан.
Тываларның «чүс чылда чаңгыс катап тѳрүттүнер кижи» дээри дег кайгамчык мерген угаанныг хөөмейжизиниң чырык овур-хевири, тускай үннүг өткүт сыгыды, амыдыралга ынакшылы дириг чижек болуп, кезээ шагда Тываның төөгүзүнге ховар эртине болуп артып каар.
