Бөгүн Тыва үндезин культура төвүнүң ажылдакчылары Кызылдың 5 дугаар гимназиязының музейинге аалдап четкенин төп дыңнаткан.
Музейниң чаа делгелгези Тываның Улустуң чогаалчызы, Тыва АССР-ниң болгаш РСФСР-ниң культуразының алдарлыг ажылдакчызы, төөгү эртемнериниң доктору, хам чүдүлге шинчилелдериниң Америка фондузунуң «Хам чүдүлгениң дириг эртинези» деп аттың эдилекчизи Монгуш Кенин-Лопсанның 100 харлаан юбилейинге тураскааттынган.
Музейниң удуртукчузу, «Улус өөредилгезиниң тергиини», дээди категорияның тыва дыл болгаш чогаал башкызы, краевед, дыка хөй санныг өөреникчилерниң дагдыныкчы башкызы Светлана Кыргысовна делгелгениң кол маадырының дугайында солун барымдааларны, төөгүлерни тайылбырлаан.
Тываларның «чүс чылда чаңгыс катап тѳрүттүнер кижи» дээри дег кайгамчык шинчилекчи, эртемден, этнограф, бурунгу өгбелерден дамчып келген угаадыглыг, ханы кижизидикчи ажылдарын салгалдарга арттырып, кезээ шагда Тываның төөгүзүнге ховар эртине болуп артып каар.
Тыва үндезин культура төвү Светлана Кыргысовнага делгелгениң дугайында солун болгаш чедимчелиг тайылбырны кылып чорутканы дээш четтиргенин илереткен.
