Чүс хире сая тонна хөмүр-дашты чөөн чүкче угландыр экспортче үндүр сөөртүр

«Россияның демир-оруктары» ажык акционерлиг ниитилел регионнар-биле 2024 чылда 100 хире сая тонна хөмүр-дашты чөөн чүкче угландыр экспортче үндүр сөөртүр дугайында дугуржулганы чарган.

«Россияның демир-оруктары» ажык акционерлиг ниитилел РФ-тиң Чазааның хөмүр-даш адырының турум ажылын хандырар болгаш демир-оруктап чүък сөөртүлгезин өйлээр сорулгалыг шиитпирин удуртулга кылгаш, Кемерово облазы – Кузбасстың, Якут, Бурят, Хакас, Тыва республикаларның база Иркутск облазының төлээлери-биле элээн каш дугуржулгаларны чарган. Бо регионнарда бүдүрүлгелерниң продукциязын Ыраккы Чөөн чүкте углай сөөртүрүнүң кол параметрлерин документиде быжыглаан.

Чедип алдынган дугуржулгалар езугаар, 2024 чылда бүдүрүлгелер чүъктү чорударынче белеткээр, а «Россияның демир-оруктары» ажык акционерлиг ниитилел Кузбасстан – 54,1 сая тонна, Якутиядан – 26,3 сая тонна, Бурятиядан – 8,5 сая тонна, Хакасиядан – 6,5 сая тонна, Иркутск облазындан – 3,3 сая тонна, Тывадан – 0,65 сая тонна хөмүр-дашты чөөн чүкче экспорт кылдыр чүдүрерин хандырар.

Демир-орук транспорту-биле продукция сөөртүлгезинге херек чүъктү хөмүр бүдүрүлгелери долу хандырар кылдыр дугуржулгаларны чоруткан.

«Россияның демир-оруктары» ажык акционерлиг ниитилелден чиңгине директорунуң бирги оралакчызы Сергей Кобзев, Кемерово облазы – Кузбасстан губернатору Сергей Цивилев, Якутиядан республиканың баштыңы Айсен Николаев, Бурятиядан республиканың баштыңы Алексей Цыденов, Хакасиядан республиканың баштыңы Валентин Коновалов, Иркутск облазындан губернатор Игорь Кобзев, Тывадан республиканың баштыңы Владислав Ховалыг олар документиге атты салганнар.

Чүък чорудукчулары биле демир-орукчуларның бүдүрүлге планнарын чаңгыс аайлап дүүштүрер сорулга-биле, инфраструктурада септелге болгаш тудуг ажылдарының планын көрүп тургаш, чөөн чүкче чүък сөөртүлгезиниң хемчээлдерин кварталдарга үлээнин дугуржулгада быжыглаан.

Ниити болгаш ниити эвес ажыглалдың инфраструктуразында шимчеп чоруур хос составты анаа-ла чоруур чүүлдерни болдурбазы-биле, барыын болгаш чөөн чүкче углай ниити ажыглалдың демир-орук транспортунуң инфраструктуразынга өй кылдыр долдур чүдүреринге таарымчалыг логистиканы ажылдап кылырын документиде айыткан.