Чаңгыс аай дүүштүрүлге төвү ис чок читкен дайынчыларның төрелдеринге деткимчени көргүзүп турар

Тываның Баштыңы Владислав Ховалыгның даалгазы-биле тургустунган ис чок читкен тускай шериг операциязының киржикчилерин дилеп-тыварынга дуза көргүзер Чаңгыс аай дүүштүрүлге төвү ам республика Чазааның составында албан кылдыр ажылын эгелээн. Чоок кижизин дилеп-тыварынга боду арга-дуржулгалыг Мира Балчый Тываның Баштыңының дузалакчызы кылдыр албан черин удуртуп турар.

Читкен өөнүң ээзин боду дилээр дээш моондактарга таварышкан херээжен, шак-ла ындыг байдалда таварышкан чаңгыс чер чурттугларынга хоойлу-дүрүм болгаш тайылбырлыг дуза кадары-биле, коммерцияга хамаарышпас организацияны тургускан. Тываның Баштыңы организацияның ажыл-чорудулгазының ажыктыын көрүп, ол саналды деткээн.

Бо чылдың майда Владислав Ховалыг ис чок читкен дайынчыларның төрелдеринге деткимче көргүзер Чаңгыс аай дүүштүрүлге төвүн тургузар дугайында шиитпирни хүлээп алган. Тываның Баштыңы шериг албан-хүлээлгелиглерниң төрээн болгаш чоок улузу-биле ужуражып тура, ындыг албан черин тургузарын чарлаптарга, чыылган чон шиитпир үезинде хүлээп алдынганын демдеглеп, деткээн.

– Чаңгыс аай дүүштүрүлге төвүнче аңгы-аңгы айтырыгларлыг кээп турар чон хөй. Тускай мергежилдиглер тускай шериг операциязының киржикчилериниң өг-бүлезинге дузалажыр дээш, шупту арга-хевирлерни ажыглап турар. «Ада-чурт камгалакчылары» күрүне фондузу-биле сырый ажылдажылга тургустунган. Ниити ажылывысты ам-даа сайзыраңгайжыдар бис – деп, Владислав Ховалыг төптүң ажылын дыңнаткан.

Дөрт чаа регионда: Луганск, Донецк Улус республикаларда, Запорожье база Херсон областарда албан чериниң төлээлери ажылдап турарын Владислав Ховалыг дыңнаткан. Олар читкен дайынчыларның документ-саавырлар-биле ажылдап, албан эрттирип турган шериг кезектериниң командылалы-биле харылзажып, организастыг ажылдары чорудуп, тус черниң эрге-чагырга черлери болгаш волонтер организациялары-биле ажылдап турар.

– Бистиң кол ажылывыс – шериг кижини дилээриниң шын чурумун тайылбырлап, ол талазы-биле ажылдыг органнарже документилерни бижииринге дузалажыр. Читкен кижизин танып тывар ажылды дүргедедир дээш, чогуур албан черлеринче херек документилерни долдуржуп турар бис. Бир эвес херек апарза, билдириишкин киирикчизин улаштыр үдээр. Чижээ, психологтуң дузазын сүмелээр. «Ада-чурт камгалакчызы» күрүне фондузунуң регионалдыг салбырында психологче чорудуп турар бис. Биске айтырыглыг келген тускай операция киржикчилериниң өг-бүлезинге дузалажырын кызыдар бис. Кижилер боттарының айтырыы-биле артып калбазын дээш, деткимчени көргүзер» – деп, төптүң удуртукчузу Мира Балчый чугаалаан.

Чаңгыс аай дүүштүрүлге төвүнүң төлээлери үстүнде ачы-дузалардан аңгыда, читкен кижизиниң мөчүзүн танып алыр кылдыр Донда-Ростов хоорайда шеригниң клиниктиг госпиталынче билдириишкин бижииринге дузалажып турарын Мира Балчый тайылбырлаан.

Чаңгыс аай дүүштүрүлге төвү дараазында адресте: Кызыл хоорай, Чульдум кудумчузу, 18, өрээл 107. Билдириишкиннерни ажыл хүннеринде хүлээр.