«Чаңгыс демниг Россия» партияның Тывада регионалдыг салбыры 24 чылдаан оюнга тураскаадып, чылдың-на эрттирер хамаатылар хүлээп алыышкынын эгелээн.
Партияның даргазы Дмитрий Медведевтиң регионалдыг хөй-ниити хүлээп алыышкын черинге Тываның Баштыңы база «Чаңгыс демниг Россия» партияның Тывада регионалдыг салбырның секретары Владислав Ховалыг хамаатыларны хүлээп алыышкынын бир дугаарында эгелээн.
Хөй-ниити хүлээп алыышкынынче республиканың чурттакчылары аңгы-аңгы айтырыгларлыг кирген, а команда болдунар аргазы-биле эң кыска үеде шиитпирлээрин кызыдар. Бо чылын тускай шериг операциязының киржикчилерин болгаш оларның өг-бүле кежигүннерин деткиир талазы-биле элээн хөй дилеглер кирген.
Төрээн чурту дээш маадырлыы-биле мөчээн дайынчыларның адын мөңгежидер бир дилег кирген. Роланд Ондар маадырның өөнүң ишти ооң төрээн чери – Сүт-Хөл кожууннуң Суг-Аксы суурнуң бир кудумчузунга ооң өөнүң ээзи Кежик Ондарның адын тыпсырын регионнуң удуртукчузундан дилээн.
«Тус чер бот-башкарылга органының удуртулгазынга бо айтырыгны чогумчалыг шиитпирлээр арганы өөренип көөрүн даастым» – деп, Владислав Ховалыг бодунуң телеграм-каналында дыңнаткан.
Хоойлуга удур арага садар чорук-биле демисел – база бир дилег. Кызылдың чурттакчызы Айжана Дулгу хоойлуга удур «арага кударның» бирээзин хаарынга дузалажырын дилээн. Владислав Ховалыг хамаатылардан кирген мындыг дыңнадыгларны хынаарын Лицензия болгаш хайгаарал албанынга дааскан.
«Корум-чурум камгалаар органнар-биле кады бо угланыышкында улуг ажылдарны чорудуп турар, ынчалза-даа ону ам-даа күштелдирер херек» – деп, Баштың демдеглээн.
Тываның культуразының алдарлыг ажылдакчызы Таисия Ортеней Тыва Республиканың амгы тугунуң автору Оюн-оол Саттың дугайында үндүрүлгени парлаарынга дузаны дилээн.
Владислав Ховалыг ол эгелээшкинни деткип, регионнуң культурлуг өнчүзүн кадагалап арттырарынга чугула херек бо төлевилелдиң күүселдезинге дузалажырын аазаан.
Декабрь 10-га чедир «Чаңгыс демниг Россия» регионалдыг хөй-ниити хүлээп алыышкын черинге хамаатыларны хүлээп алырының декадазы уламчылаар. Хүлээп алыышкынче кирер күзелдиг улус 8 (394 22) 3-38-31 дугаарлыг телефонче долгааш, бижидип ап болур.
