Чаңгыс удаа бээр чүс муң рубль хемчээлдиг регионалдыг төлевирлерни шилчидип эгелээн

Тывада "Вагнер" хууда шериг компанияның амы-тынындан чарылган дайынчыларның төрээн улузунга регионалдыг төлевирлерни төлеп эгелээн.

ТР-ниң Күш-ажыл болгаш социал политика яамызы, «Вагнер» хууда шериг компанияның амы-тынындан чарылган дайынчыларының өг-бүлелериниң 38 кежигүнүнүң бижээн билдириишкини-биле, орнукшудулга акшазын шилчидип эгелээн. Ам-даа 10 билдириишкин ээлери херек документилерин чыып турары-биле, бо неделя төнчүзүнде төлевирин алыр.

Өске регионнарда ышкаш, республиканың эрге-чагыргазы тускай шериг операция киржикчилериниң ол категорияда дайынчыларының төрээн кижилеринге ындыг төлевирлиг деткимче хемчээн көргүзер шиитпирни хүлээп алган.

Тываның Чазаа июнь 1-де, "Вагнер" хууда шериг компанияның дайынчыларын орнукшударынга чаңгыс удаа бээр 100 муң рубль хемчээлдиг регионалдыг төлевирни кылдырарын бөдүүнчүдер чурумну хүлээп алган.

Тускай шериг операциязының киржикчилериниң, ооң санында вагнержилерниң, төрээн кижилеринге ындыг деткимче хемчээн бээр талазы-биле ооң мурнунда хүлээп алган документиде, сөөлгү албан хүлээлгезин эрттирген черинден, бо таварылгада “Вагнер” хууда шериг компаниязындан шынзыдылга бижикти албан киирер дугайында негелдени айыткан. Хуу компания ындыг документ бербээнинден, чок болган вагнержилерниң өг-бүлелери ындыг шынзыдылга бижикти берип шыдавас болган.

Чок болган “вагнержиниң” чоок улузу ол кижиниң мөчээн черин база ооң чылдагаанын айыткан тус черниң хамааты байдалдың актылар бижидилгезиниң эргелелинден шынзылга бижикти кожарын чаа чурумда доктааткан.

"Вагнер" хууда шериг компаниязының одуруунга шериг албан-хүлээлгезин эрттирип тургаш мөчээн таварылгада, Коми, Марий Эл, Хакас республикаларда база Владимир облазында регионалдыг төлевирлерни доктааткан.

"Вагнер" хууда шериг компанияның одуруунга боттарының сөөлгү хүлээлгезин эрес-дидим күүсеткен дайынчыларның төрээн болгаш чоок кижилери регионалдыг төлевирлерни Күш-ажыл болгаш социал политика яамызынга долдуруп болур: Кызыл хоорай, Московская кудумчузу, б. 2 (4 каът), телефону - 8(39422)3-05-99.