Чаа арганың кол онзагайы – дузага хереглелдиг чаңгыс чер чурттугларны илередири

Төлевилел шимчей албас хамаатыларның социал хандырылгазын организастаарының база ажаап-карактаарының чаа системазын ажыглаар арга-хевирлерже

Назылап-кыраан болгаш кадыкшылының байдалы-биле харык-шинээ кызыгаарлыг кижилерни үр үеде ажаап-карактаарының системазын тургузар «орук картазы» бадылаттынган.

Тывада назылап-кыраан болгаш кадыкшылының байдалы-биле харык-шинээ кызыгаарлыг кижилерни үр үеде ажаап-карактаарының системазын тургузар хемчеглер планын ажылдап кылгаш, хүлээп алган. Тываның Баштыңы Владислав Ховалыг чогуур айтыышкынга атты салган.

Төлевилел шимчей албас хамаатыларның социал хандырылгазын организастаарының база ажаап-карактаарының чаа системазын ажыглаар арга-хевирлерже өскертилгелерни кииреринче угланган регионда шенелде ажылды чорудар.

Ол системаны тургузуп эгелээн Россияның 55 регионунуң санында Тыва база киргенин төлевилелдиң кол координатору ТР-ниң Күш-ажыл яамызы тайылбырлаан. Боттарын ажаап шыдавас кижилерге таарыштырган социал болгаш эмчи дузазын хандырары – ооң сорулгазы. Бажыңынга-даа, эмнелгеге-даа ачы-дуза чедирилгезин оларга көргүзери документиде айыттынган. «Орук картазы»-биле ажаап-карактаарының дузалакчыларын белеткээр школаларынга бодунуң чоок, харык-шинээ кызыгаарлыг кижизинде дузалажып турар төрелдерин өөредир.

Ажаап-карактаар системаның арга-хевирлерин ажылдап кылыр шенелде черлер кылдыр Кызыл хоорай биле Кызыл кожуунну шилип алган. Эрткен чылдың күстен бээр дузалакчылар белеткээр школаларга 225 санныг эмчи болгаш социал ажылдакчы өөредилгени эрткен. Оларның карактаашкынында узун назылыг болгаш харык-шинээ кызыгаарлыг 200 кижи бар.

Чаа арганың кол онзагайы – дузага хереглелдиг чаңгыс чер чурттугларны илередири. Ооң мурнунда дузага хереглелдиг кижилерни чүгле төрелдериниң билдириишкиннери-биле тып турган болза, ам ону социал албан черлериниң ажылдакчылары боттары илередип турар.

Регионалдыг дүүштүрүлге төвүн организастап, үр үеде ажаап-карактаарының системазын тургузарынче хаара туттунган албан черлериниң ажылын ынаар угландырган.

Регионалдыг дүүштүрүлге төвү үр үениң ажаалдазы херек кижилерниң дугайында информация медээлер баазазын чыыр. Төптүң эксперттери хайгааралында кижилерге кандыг дуза херегин тодарадыр. Төп мониторинг кылырындан аңгыда, ажаакчы кадрларга хереглелди тодарадып, кордакчыларны дилеп, оларны белеткеп, өөредип, ажаап-карактаарынга ажыглаар техниктиг дериг-херекселдер хөлезилээр пунктуларны ажыдып, ону ажылдадыр.

Инвалидтерниң федералдыг даңзызындан алырга, 2023 чылдың январь 1-де Тывада 23 412 инвалид бар, азы республика чурттакчыларының 7 хуузу (РФ-те – 7,5 хуу). 3005 кижи – бирги бөлүктүң, 8495 кижи – ийиги бөлүктүң, 9072 кижи – үшкү бөлүктүң инвалидтери. Чыл эгезинде даңзыда 2,5 муң ажыг инвалид уруглар бары демдеглеттинген.