Бай-Тайга кожууннуң Шуй сумузунда эмчи амбулаториязының фельдшери Буян Чооду Базырак-Адаа деп черде малчыннарны халдавырлыг аарыгларга удур тарытканын чагырга чери дыңнаткан.
«Идепкейжи узун назын» национал төлевилелдиң кадык камгалалының эгеки чаданың чаартылгазы программазының ачызында медицина албан черлери автотехниказын чаартканы-биле ачы-дуза чедирилгези республиканың ыраккы суурларының чурттакчыларынга чедингир апарып, экижээн. Фельдшер эмчилер орук чок черлерни эртип шыдаар «демир аъттары-биле» бирги ээлчегде малчын коданнарга чедип, көдээ ишчилерни шинчилеп турар.
Шуйжулар ук программаның ачызында «УАЗ 452» маркалыг автомашинаны алган. «Эрткен чылдың декабрьда чаа оран-сававысты байырлыг байдалга ажыдып турда, чаа автомашиналыг болурун күзеп турдувус. Ам чүгле бистиң эвес, а сумунуң шупту чурттакчыларының күзели бүткен. Автотранспорт бистиң ажылывыска чугула херек» – деп, Буян Чооду чугаалаан.
«Кадык камгалалы» национал төлевилелдиң кадык камгалалының эгеки чаданың чаартылгазы программазы-биле Шуй сумузунда эмчи амбулаториязын тутканын сагындыраал.
Шуй кожуун төвүнден 20 километр черде, ында 1800 ажыг кижи чурттап турар. Сумунуң девискээринде 27 малчын кодан бар.
