Тывада чаа регионнар, ол ышкаш Курск биле Белгород областар девискээрлерин камгалап турар шериг албан-хүлээлгелиглерге ачы-дуза чыылдазы уламчылап турар. Улусчу фронт биле Тываның Чазаа июль төнчүзүнге чедир 40 тоннадан эвээш эвес чүъктү чорударын планнаан.
Чаа-Хөл кожууннуң чурттакчылары чайгы ачы-дуза чыылдазында идепкейлиг киржип турарын чагырга чери дыңнаткан. Кожууннуң Өг-бүлеге болгаш уругларга социал дуза чедирер төвүнүң кижизидикчи башкызы Айдысмаа Ондар идепкейжилерниң бирээзи. Ол ачы-дуза чыыр пунктуже артышты дамчыткан.
Шериглерниң дилээ-биле дузаны чыыры чаңчыл апарган. Улусчу фронтунуң регионалдыг салбырының дыңнатканы болза, чайгы бо үеде, ужудукчу чок аппараттар, рациялар дээш оон-даа өске техниктиг дериг-херексел, генераторлар, бензин-биле ажылдаар хирээлер, тудуг материалдары негеттинип турар. Ол ышкаш электрилиг чадаг-тергелер болгаш мотоциклдер дээн ышкаш дааш чок машиналар база хереглелдиг.
Улусчу фронтунуң регионалдыг салбыры «Улусчу фронт. Шупту чүүлдү тиилелгеже» ачы-дуза чыылдазынга киржирде, бо айтыгже кирерин сагындырып тур: [#alias|pobeda.onf.ru/requiremen…|pobeda.onf.ru/requiremen…]
Кызылда посылкалар болгаш техниктиг дериг-херекселдер хүлээп алыр пунктулар дараазында адрестерде: Чульдум кудумчузунуң 40А база Ленин кудумчузунуң 5 дугаар бажыңда база муниципалдыг чагырга албан черлеринде. Айтырыглар бар болза, 2-10-50 дугаарлыг телефонче долгаар.
