Чаа национал төлевилел-биле ужудукчу чок хамааты ужар чүүлдер санын көвүдедир

Тыва «Ужудукчу чок ужар системалар» чаа национал төлевилел-биле ужудукчу чок хамааты ужар чүүлдер санын көвүдедир.

Сибирь федералдыг округта РФ-тиң Президентизиниң бүрүн эргелиг төлээзи Анатолий Серышевтиң удуртулгазы-биле эрткен хуралда «Ужудукчу чок ужар системалар» национал төлевилелдиң округтуң регионнарында боттаныышкынын сайгарып чугаалашкан. Россияның Президентизи Владимир Путинниң идип үндүргени национал төлевилел күүселдезин ол бодунуң хууда хыналдазында алган.

Национал төлевилелдиң сорулгазы – ужудукчу чок хамааты ужар чүүлдерни ажыглаар адырны тургузуп, ооң бүдүрүлгезинге технологтуг хамаарышпас чорукту чедип алырында. Округтуң шупту регионнары Россияның Президентизиниң даалгазын күүседиринче кирген деп, Анатолий Серышев демдеглээн. 2024 чылда ада-чурттуң ужудукчу чок ужар аппараттар сайзыралынче база хереглелдерин деткииринче Сибирь федералдыг округ регионнарынга федералдыг бюджеттен 3,3 хире млн рубльди үндүрери планнаттынган деп, бүрүн эргелиг төлээ чугаалаан.

Национал төлевилелдиң эң-не капитал киирилделиг кезээ – ужудукчу чок ужар авиация системаларының технологияларын сайзырадыр талазы-биле регионалдыг эртем-шинчилел болгаш бүдүрүлге төптерин тургузары.

Новосибирск биле Иркутск областарда оларны тургузары-биле идепкейлиг ажылдар чоруп турар, а Томск облазында ындыг төптү бо чыл төнчүзүнде ажыдар. Ужудукчу чок системалар-биле ажылдаарынга чөпшээрелдиг өөредилгени Сибирь федералдыг округта 40 өөредилге төвү чорудуп турар.

Бо чылдың мартта “Ада-чурттуң ужудукчу чок авиация системаларынга хереглелди хандырары” федералдыг төлевилелдиң удуртукчузу – Россияның Үлетпүр болгаш садыглаашкын яамызы-биле чарган керээ езугаар Тывада регионалдыг төлевилелди республиканың Арга-арыг ажыл-агыйы болгаш бойдус ажыглалының яамызы удуртуп башкарар.

Бистиң республика 2024 чылдың төнчүзүнге чедир ужудукчу чок ужар 13 аппаратты садып алыр. Тываның Арга-арыг яамызының удртулгазында албан черлеринге ол системаларны үлээр. Адырның тускай эртемниглери аппараттарны башкарарынга өөредилгени эртер.

Республикада арга-арыг ажыл-агыйынга болгаш арга-арыг өрттериниң байдалын үргүлчү хайгаараарынга, чедери берге черлерге өрттер болу берген таварылгада харылзааның шынарын экижидеринге, айыыл-халаптарны чайладырынга медээни үезинде дамчыдып, шиитпирлерни дүрген хүлээп алырынга ужудукчу чок ужар чүүлдерни ажыглаар. Оон аңгыда, арга-арыг хайгааралынче чарыгдалдарны камнап, агаардан хайгыылдаашкынның шынарын экижидип, өрттер өжүрерде медээ дамчыдылгазын дүргедедир.

Ниитизи-биле алырга, Сибирьниң регионнарында национал төлевилелдиң шугуму-биле 2024 чылдың ийиги чартыында арга-арыг ажыл-агыйының хереглелдеринге дээш 168 ужудукчу чок ужар аппаратты садып алыры көрдүнген.