Тываның Чазаанга Национал төлевилелдер талазы-биле комитеттиң хуралынга «Үре-түңнелдиг болгаш чижилгелиг экономика», «Күрүнениң медээлер экономиказы болгаш чурагайлыг эде тургустунуушкуну» база «Туризм болгаш аалчылар хүлээп алыышкыны» нацтөлевилелдерни күүсеткениниң түңнелдерин көрген. Ужуражылганың түңнелинде, Национал төлевилелдер күүседикчилеринге хемчеглерни үе-шаанда боттандырар болгаш ажылдың отчеттарын үезинде дужаар даалгаларны берген.
ТР-ниң Экономика болгаш үлетпүр сайзыралының яамызы «Үре-түңнелдиг болгаш чижилгелиг экономика» национал төлевилелдиң хемчеглерин боттаныышкынын харыылап турар. Национал төлевилел шугуму-биле «Биче болгаш ортумак сайгарлыкчы чорук болгаш хууда сайгарлыкчы эгелээшкиннерни деткиири» база «Күш-ажылдың бүдүрүкчүлүү» деп ийи регионалдыг төлевилелдерни албан чери боттандырар. Бирги төлевилелде бүдүрүлге шөлдеринче база үлетпүрлүг бүдүрүлге парктарынче чиигелделиг болгаш магадылалдыг ачы-дуза-биле микрочээлилерни бээр кылдыр, биче болгаш ортумак сайгарлыкчы чорук субъектилеринге саң-хөө болгаш саң-хөөге хамаарышпас деткимче хемчеглерин бээри көрдүнген.
Айыттынган төлевилелдерниң регионалдыг администратору, экономиктиг хөгжүлде сайыдының бирги оралакчызы Снежана Ховалыг национал төлевилел күүселдезин хандырар регионалдыг төлевилелдер талазы-биле ажыл-чорудулга план езугаар чоруп турарын дыңнаткан. Биче болгаш ортумак сайгарлыкчы чорук субъектилеринге немелде акша-хөреңгини хаара тударынче 0,09 млрд. рубль түңнүг магадылалдыг деткимчени көргүскен, чиигелделиг негелде-биле 39,43 сая рубль чээли акша-хөреңгизин үндүрген.
«Күш-ажылдың бүдүрүкчүлүү» төлевилел езугаар бүдүрүлгелерде күш-ажылдың бүдүрүкчүлүүн бедидер, бүдүрүлгеге хумагалыг чорукка өөредир, ол ышкаш ажылдап турар кижилерниң диспансер хайгааралының санын көвүдедиринче угланган хемчеглер эртип турар. Бо чылын бүдүрүлгелерниң болгаш организацияларның 120 ажылдакчызынга хумагалыг бүдүрүкчү аргаларны өөредири планнаттынган.
Регионалдыг чурагайлыг хөгжүлде яамызы – «Күрүнениң экономика медээлери болгаш чурагайлыг эде тургустунуушкуну» национал төлевилелдиң күүседикчизи. 2026 чылда национал төлевилелдиң хемчеглерин албан боттандырары көрдүнген, а бо чылын албан чери белеткел ажылдарын чорудар.
Национал төлевилел күүселдези-биле школа башкыларынга чурагайлыг өөредилге хандырылгазынче болгаш чурагайлыг өөредилге материалдарынче камгалалдыг киреринге ада-чурттуң мобильдиг операция системазын тургускан планшеттери-биле хандырары көрдүнген. Оон аңгыда «Интернет» четкизинче кирер удазын чок Wi-Fi четкизин тургузуп, школаларның болгаш ортумак профессионал өөредилге черлериниң кирер бөлүктеринге видеохайгааралды хандырар ажылдарны чоруп турар.
База ол ышкаш национал төлевилелде «Чурагайлыг күрүне эргелеп-башкарылгазы» регионалдыг төлевилел шугуму-биле күрүне ачы-дузазын болгаш ачы-дузаларын чурагайлыг хевирге көргүзер инфратургузугну хөгжүдеринче угланган элээн каш хемчеглер планнаттынган. Амгы үеде «Күрүнениң регионалдыг тудуг хайгааралы» база «Күрүнениң чуртталга-коммунал ажыл-агый хайгааралы» күрүне ачы-дузазын чедиреринге чаңгыс аайлаан ийи шиитпир ажылдап кылдынган. Бо чылдың август айда информация системаларын ажылдадыр.
«Ада-чурт шиитпирлери» регионалдыг төлевилел-биле экономиканың кол адырларының күрүне организацияларын болгаш бүдүрүлгелерин Astra Linux ада-чурт программазының хандырылгазынче база электроннуг дериг-херекселче шилчиирин хандырар. Бо хүнде ада-чурт программазының хандырылгазынче 1764 автоматчыткан ажылчын олутту шилчиткен, ол дээрге ниити санның чартыы-дыр.
ТР-ниң Туризм талазы-биле күрүне комитединиң удуртукчузу, ол ышкаш национал төлевилел составында «Өрээлдер фондузун, инфратургузугну болгаш хаара тударының чаа черлерни тургузары» деп регионалдыг төлевилелдиң удуртукчузу Буянзак Түлүш «Туризм болгаш аалчылар хүлээп алыышкыны» национал төлевилелдиң күүселдезин илеткээн.
Россияның Экономиктиг сайзырал яамызының чарлааны, 2025-2027 чылдарда модульдуг, капитал эвес чуртталга объектилерин тударының инвестиция төлевилелдериниң мөөрей шилилгезинге, Тыва Республикадан үш чагыг: Дус-Хөл болгаш Хадың хөлдерге дыштанылга төптерин база Тыва Республикага спорттуң паралимпийжи хевирлерин сайзырадырынга Каа-Хем кожуунга «Белдир» ниитилелдиң шупту кежигүннеринге дыштанылга баазазын тудар төлевилелдер эрткенин дыңнаткан.
Бо дыштанылга черлериниң тудуу регионнуң турисчи инфратургузуг объектилеринде өрээлдер санын көвүдедиринге идигни бээр. Күрүне комитеди Россия Федерациязының Экономиктиг хөгжүлде яамызы-биле дыштанылга төптерин тударынга субсидияны бээр дугуржулганы чарар дээш ажылдап турар.
Күрүне комитеди оон аңгыда, туризм адырының субъектилеринге «Аалчылар хүлээп алыышкыны» турисчи объектилерге чөпшээрел бээр национал системаның чаңгыс аай даңзызынга бүрүткел талазы-биле методиктиг дузаны көргүзери-биле ажылдап турар.
