Национал школа хөгжүдер институт Кызыл хоорайның чагырга чериниң культура, спорт болгаш аныяктар политиказының департаментизи демнежип, Кызылдың 9 дугаар гимназиязының этнопедагогиктиг курлавыр төвүнүң методист башкылары Анна Ооржак, Светлана Шулуу-Маадырның «Өг-бүле байырлалдары» деп чаа номунуң таныштырылгазын «Найысылал» арт-төпке эрттиргенин институт дыңнаткан.
Башкының болгаш дагдыныкчының чылын тураскааткан онзагай хемчегге улусчу ужурлар болгаш тыва дыл, чогаал башкылары, студентилер, ада-иелер, школаларның өөредилге-кижизидилге ажылының идепкейжилери, байырлалдар башкарыкчылары идепкейлиг киришкеннер.
Аныяк-өскенге чагыг-сүмелиг номнуң үнүп келгенинге өөрүп, Национал школа хөгжүдер институттуң директору Е. М. Куулар байырлыг сөс алган. Тыва филология лабораториязының методизи, үнүп келген чаа номнуң редактору Л.Х. Ооржак хоочун башкыларның могаг-шылаг чок ажылдап чоруурунга мөгейип, боодал чечектерни номнуң авторларынга сөңнеп, йөрээл сөстерни номчаан.
Кежээниң хөгжүм каасталгазын Тываның Улустуң хөөмейжизи болгаш алдарлыг артизи Андрей Монгуш база Шончалай Чооду-Ооржак олар чыылган аалчыларга аян туткан. А.К. Ооржактың бижээни чаа ырыларның баштайгы күүселделерин чон сеткил таалал-биле дыңнааннар.
«Уруг дою – ыдык ёзулал», «Чуртталганың каастакчызы келин кысты дилээри», «Чавагазын салбактаңар» деп чараш езу-чаңчылдарны «Найысылал» арт-төвүнүң ажылдакчылары сценага канчаар шын эрттирерин херек кырында тайылбырлап көргүскени онзагай чараш, өөредиглиг болган.
«Куда езулалы» деп сценажыткан көргүзүгге беш аңгы өңнүг кадактар-биле аныяктарны деткип, йөрээр база «Назын дилээри» деп езулалдарны хоочун башкылар А.К. Ооржак болгаш С.Ч. Шулуу-Маадыр кончуг таптыг тайылбырлыг таныштырып бергеннер.
«Өг-бүле байырлалдары» деп чаа ном ажыктыг ном дээрзин келгенннер демдеглеп, бедии-биле үнелээннер.
Өг-бүле байырлалдарын демдеглеп эрттирери амыдыралдың агымындан чарылбас чугула болгаш уттундурбас өөрүнчүг сактыышкын болур дээрзи билдингир. Өөредиглиг болгаш кижизидикчи утка шынарлыг эрткен өг-бүле байырлалы аныяк-өскенге үлегер-чижек болбушаан, кадык амыдыралдың оруун айтып берип турар.
