Чеди-Хөл кожууннуң Хову-Аксы школазының өөреникчилери улуг вожатый А.А. Уважаның удуртулгазы-биле төп ном саңының ажылдакчыларынга көжеринге дузалашканын чагырга чери дыңнаткан.
Кожуун чагыргазының аныяктар политиказының талазы-биле башкарыкчы специализи болгаш школачылардан аңгыда ном саңының ажылдакчыларының ажы-төлү база дузазын каткан.
«Сорунза» төлевилели үениң аайы-биле хөгжүп, нептерээнин демдеглээри чугула: ооң мурнунда төлевилел-биле чүгле чаа культура төптерин тудуп турган болза, эрткен чылын төлевилел-биле Чеди-Хөл кожууннуң төвү Хову-Аксы суурга ном саңының тудуун бир-ле дугаар эгелээнин сагындыраал.
Чеди-Хөл кожууннуң ном саңы, 1969 чылда туткан тус черниң Культура бажыңының бичии өрээлинге турган. Бир каът оран-саваның ниити шөлү – 353 дөрбелчин метр.
ТР-ниң Культура яамызының дыңнадып турары-биле алырга, май 24-те чаа ном саңын байырлыг байдалга ажыдар.
