Сүт-Хөл кожууннуң уругларның үлегер-майыктың ном саңының «Таныжыңар уруглар!» деп чаа төлевилелиниң «Чеди чүзүн мал» деп үндүрулгезиниң таныштырылгазы болуп эрткенин ном саңы дыңнаткан.
Сүт-Хөл кожууннуң чагыргазының төлээзи Алдына Конгар-ооловна, Хөй-Ниити палатазының кежигүнү Светлана Анзатовна, культура эргелелиниң даргазы Урана Чылбак-ооловна, төпчүткен ном саң системазының даргазы Лада Конгаровна ном саңының ажылдакчылары уругларга өөредиглиг видео үндүрүлгени бедик деңнелге белеткеп кылганын демдеглеп, байыр чедирген.
«Таныжыңар уруглар!» деп төлевиледиң «Чеди чүзүн мал» деп үндүрүлгезинде тыва чоннуң азырап чоруур чеди чүзүн малының болгаш оларның төлдериниң дугайында көргүзүп, тайылбырлап турар.
Төлевилелди амгы үениң ажы-төлүнге тускай, эптиг кылдыр тургускан, олар делегей четкизи дамчыштыр сонуургаан чүүлдерин идепкейлиг билип ап турарлар. Оларга видео таварыштыр бистиң чер чурттувустуң байлаан бичии уругларга чедирериниң аргазын тып ажылды чоргускан. Ам төрээн тыва дылывысты, азырап чоруур мал-маганывысты өөренири солун болгаш улам чедингир апарган.
Ном саңының ажылдакчылары салым-чаяанныг кижилерниң кады күжениишкиннериниң ачызында культуравыстың байлаан салгалдарывыска дамчыдар аас-кежиктиг болганын демдеглеп турар.
Төлевилелдиң онза чоргааралы – хөгжүм кезии. Ырыны тургузарынга «Сүт-Хөлдүң чалгыглары» чечен чогаал каттыжыышкынының кежигүнү Элдеп Ондар сөзүн чогаадып тургускан, аялгазын төлевилелдиң тургузукчузу Айдаш Монгуш чогаадып кылган. Кайгамчык ырыны Кара-Чыраа сумузунуң Монгуш Дарый аттыг көдээ культура бажыңының уран чүүл удуртукчузу Сайдай Ондар ырлап күүсеткен. Үн бижидилгезин кожууннуң культура бажыңының уран чүүл удуртукчузу Күндел Хөвендей кылган.
