2026-2030 чылдарда Россия биле Моолдуң регионнар аразының кады ажылдажылга программазынче Тываның кызыгаарлар аразының транспорт-логистика төлевилелдери кирген. Декабрь 1-де Иркутск хоорайга болуп эрткен ийи чурттуң регионнарының бирги шуулганынга ол программаны бадылаан.
Россияның Экономиктиг хөгжүлде яамызы база Моолдуң Экономика болгаш хөгжүлде яамызы документиге атты салган. Ында Россия Федерациязының регионнары биле Моолдуң аймактарының аразында кады ажылдажылганың аңгы-аңгы угланыышкыннарында 120 ажыг хемчег кирген. Оон аңгыда шуулган үезинде кады ажылдажылга дугуржулгазын Россия биле Моолдуң регионнары, ооң иштинде Тыва база чарган.
Тываның Баштыңы Владислав Ховалыг бо эрткен шуулган Моол болгаш ооң аймактары-биле шаандан найыралдыг харылзааны кады хөгжүдеринге, быжыглаарынга болгаш калбартырынга онза ужур-уткалыг дээрзин демдеглээн. «Бистиң чурттакчыларывыска чаа төлевилелдерни болгаш аргаларны кады тургузар дээш, арга-дуржулгавысты үлежиринге, коллегаларывыстан өөрениринге белен бис» – деп, ол бодунуң телеграм каналынга кожалар-биле келир үеде кады ажылдажылга дугайында бижээн.
Россия биле Азия-Оожум океан регион чурттарының аразынга садыг-экономиктиг немелде коридорларны тургузарынче угланган транспорт-логистика инфратургузуун тургузар төлевилелдерден аңгыда, Тыва болгаш Моол делегациялар шуулганга бот-боттарынга сонуурганчыг элээн каш оон өске эгелээшкиннерни сайгарып чугаалашкан.
Моол-биле кады ажылдажылгада эът болбаазырадыр болгаш оон продукция бүдүрер элээн каш улуг төлевилелдер холбашкан. Тываның эрге-чагыргазы Моолдан эътти садып кииргеш, республикага үлетпүр эът болбаазырадыр улуг комплексти ажыдар дээн ышкаш өске-даа ажылдаар хевирлерни бизнес-биле шинчилеп турар.
Агроүлетпүр комплекизин харыылаар албан чериниң шугуму-биле Моолдан баят уксаалыг бүдүрүкчү кошкарларны болгаш хойларны садып алыр арганы шинчилеп турар. Күш деңгели, дүктү бээри база чөөгүнүң шынары-биле олардан дудак чок тыва чолдак семис кудуруктуг хойларның продукция бээрин база шынарын экижидеринге оларны ажыглаар.
Моолдуң кызыгаар кожууннары-биле дүк болбаазырадыр цехти чиг эт-биле хандырарынга кады ажылдаар планнар бар. Владимир хоорайның «Сергеихинский текстиль» компаниязы-биле кады ажылдажылга 2024 чылда эгелээн. Компания дүктүң эге болбаазырадылгазындан эгелээш дыраан дүк, чөөк, кидис бүдүрерин планнап турар.
Тыва биле Моолдан төлээлер ветеринария, кызыгаар девискээрлерниң айыыл чок чоруу, кызыгаар черлерге арга-арыг өрттери-биле демисел, студентилер солчулгазы, туризм дээш, өске-даа адырларда кады боттандырар төлевилелдерни шуулганның шөлдеринге сайгарган. Чамдык идеялар дораан деткимчени алган, чижээ, Тыва, Моол, Алтай девискээрлери таварты турисчи маршрутту кады тургузар дугайында дугуржулга чедип алдынган.
