Ак-Довурак хоорайның чурттакчызы Билик Аясович биче кофейняны ажыдып алганын ТР-ниң Чонну ажылга хаара тудар төп дыңнаткан.
Социал керээге үндезилээн күрүне деткимчезиниң ачызында эгелеп чоруур сайгарлыкчы кофе-машинаны, соодукчуну, быжыртынар шкаф, миксер дээш оон-даа өске дериг-херекесел-биле чепсегленгеш, ажылдап кирипкен.
Садып алыкчылар чаагай чыттыг кофени боттары шилип алгаш, аныяк сайгарлыкчының амданныг быжырганнарын болгаш пирожноелерин амзап турарлар.
Ак-довуракчылар чаңгыс чер чуртуун деткип, аңгы-аңгы амданнарлыг кофени садып ап, торттарны база күзелдии-биле чагыдып алыр апарган.
Социал керээге үндезилээн күрүне деткимчези дөрт аңгы угланыышкынныг: ажыл дилеп-тывары, бодунуң хууда ажыл-херээн ажыдары, хууда дузалал ажыл-агыйын хөгжүдери, амыдыралдың берге байдалын ажып эртери.
2020-2023 чылдарда социал керээге үндезилээн күрүне деткимчезин Тываның 15544 чурттакчызы алган. Ажыл-херээн ажыдып алыр күзелдиг улус чурттап турар чериниң аайы-биле Чонну ажылга хаара тудар төпче кээп болурун сагындыраал.
