Аныяктар өргээзинге тускай шериг операциязының киржикчизи, аныяк шүлүкчү, Россияның болгаш Тываның чогаалчылар эвилелиниң кежигүнү Кашпал-оглунуң «Чаалыг шөлден чагаалар/Угли войны» деп номнуң таныштырылгазы болуп эрткенин ТР-ниң Дээди Хуралының депутады Аяна Монгуш дыңнаткан.
Тускай шериг операциязының үезинде маадырлыы-биле амы-тынындан чарылган дайынчыларга мөгейигниң минутазын чарлаан.
Россияның Маадыры Буян Куулар, ТР-ниң Дээди Хуралының депутады Аяна Монгуш, Тываның Иелер комитединиң кежигүннери дайынчы шүлүкчүге байыр чедирип, ном таныштырылгазынга киришкен.
Шериг хайгыылчызының сеткилинден бижээн шүлүктери – дайын шөлүнден ээп келбээн маадырларны чыылганнарга сагындырган. Чогаалчы хүндүткел болгаш өөрүп четтириишкин-биле ава бүрүзүнге бодунуң номун белекке сөңнээн.
«Иелер комитеди-биле демнежип, тускай шериг операциязының үезинде чок болган дайынчыларның маадырлыг чоруун мөңгежидер талазы-биле ажылдың моон соңгааргы планын дугуруштувус. Чогаалчылар Оюмаа Малчын биле Светлана Ондар биске дузалажыр күзелин илеретти» – деп, депутат чугаалаан.
Шүлүкчүнүң «Чаалыг шөлден чагаалар» шүлүктер чыындызының номун Россияның Чогаалчылар эвилелиниң баштаар чериниң кежигүнү – билдингир чогаалчы, прозачы, шериг журналист, очулдурукчу Валерий Латынин орус дылче очулдурган.
Кашпал-оглу шүлүктеринде езулуг тыва эр кижиниң мөзүлүүн, бүдүштүүн, дидимин, мерген угаанын, туруштуун көргүскен. Чеже-даа амыдыралдың бергелерге таварышса, ол тура дүшпээн. Дайынчының шүлүктери «Литературная газета» солунунга парлаттынган, «Чаалыг шөлден чагаалар», «Угли войны», «Мөңге шуглак» номнары орус, тыва дылдарда үнген.
Шериг хайгыылчызы Кашпал оглу тускай шериг операциязынче, чуртун камгалаар дээш, эки турачылап чорупкан.
Ном таныштырылгазы ТР-ниң Дээди хуралының депутады Аяна Монгуштуң деткимчези-биле эрткен.
...Эргим ынак авазынга "ээп кээр мен" дээн...
Эртенги хүн үнмейн баарын кайын билген,
Чаштыг караан күжүр ие чодуп арткан...
Чаалыг шөлден эглип келбээн чуртум оглу...
... Даянгыыштыг адазынга "ээп кээр мен" дээн...
Даартагы хүн дүшпейн баарын кайын билген.
Даңза тыртып, күжүр ада оглун манаан...
Дайын шөлде мөңге арткан чуртум оглу...
"Чуртум оглу", Кашпал-оглу
