Сарыг-Септиң С.О.Тамба аттыг төп үлегер-майыктың ном саңының хуралдаар залынга уруглар садтарының кижизидикчи башкыларынга тыва дылга шүлүк мөөрейи болуп эрткенин тыва номнар килдизиниң эргелекчизи Ч.К. Хилин дыңнаткан.
Каа-Хем кожууннуң өөредилге эргелели библиотекарьларны жюри кежигүннери кылдыр чалаан. Мөөрейни Тыва дыл хүнүнге тураскаадып эрттирген. Кожууннуң аңгы-аңгы булуңнарындан келген кижизидикчи башкылар салым-чаяанын көргүзүп, шээжилеп алган шүлүктерин чугаалаан.
Оон аңгыда ном саңынга аалчыларга экскурсияны эрттирген. Мөөрейниң киржикчилери чаартынган төп ном саңын сонуургап көргеннер.
“2021-2025 чылдарда культураның болгаш уран чүүлдүң сайзыралы” күрүне программазының “Социал-чогаадыкчы чагыг” программазы-биле хөй-ниитиге чедингир ном саңнарын чаартырының талазы-биле республика мөөрейинге Каа-Хем кожууннуң төп библиотеказы тиилекчи болганын сагындыраалы.
Амгы үеде библиотекалар медээчи болгаш культура-чырыдыышкын хүлээлгелерин күүседип турар. Мындыг байдалдарда библиотека ажылының чаартылга хевирлерин болгаш арга-хоргаларын нептередири чугула.
